«Կառավարություն ներկայացվել է 14 ներդրումային ծրագիր». Շիրակի մարզպետ

Օրերս «Շիրակ» ՀԸ-ի նախաձեռնությամբ տեղի ունեցավ Շիրակի մարզպետ Արթուր Խաչատրյանի մամուլի ասուլիսը, որի ժամանակ, ի թիվս այլ հարցերի, Շիրակի մարզպետն անդրադարձել է կառավարություն ներկայացված ներդրումային ծրագրերին:

Ըստ Ա.Խաչատրյանի՝ կառավարություն ներկայացվել է 14 ներդրումային ծրագիր: «Գովք» ՍՊԸ-ին է տրամադրվել նախկին «Շիրակ» հյուրանոցի գույքը, իսկ քաղաքապետարանին՝ անհատույց հողատարածքը: Այստեղ կառուցվելու է զվարճանքի կենտրոն, առևտրի սրահ, 3 տարվա ընթացքում նախատեսվում է 100-150 նոր աշխատատեղ ստեղծել, 1 մլրդ դրամի ներդրում կատարել: Մարզամշակութային ՍՊԸ-ին 100 մլն դրամի վարկ է տրամադրվելու, որի նպատակը կենտրոնի վերականգնումն է, որպեսզի քաղաքում ունենանք մարզական և մշակութային կենտրոն: Բավրայում հնդկաձավարի արտադրության կազմակերպման համար դիմել էին կառավարություն, որպեսզի անվճար տրամադրվեր զտիչ հաստոց սարք: Կարող ենք ասել, որ 14 ծրագրերից 11-ն իրականացվել է: Մնացած ծրագրերը, որոնք վարկունակ չէին, մերժվեցին»,- հայտարարել է Շիրակի մարզպետը:

Ասուլիսի ընթացքում անդրադարձ է կատարվել Շիրակի մարզում կոյուղաջրերի մաքրման կայան ունենալու անհրաժեշտությանը, քանի որ աղտոտված ջրերը հասնում են ջրամբարներ, որոնց ջուրն օգտագործվում է ոռոգման նպատակով: Կլինե՞ն լաբորատորիաներ, որոնք կզբաղվեն գյուղմթերքների ստուգմամբ:

«Ներկա ֆինանսական միջոցները թույլ չեն տալիս, որպեսզի ախտահանող կայաններ դնենք, վերահսկենք, որպեսզի կոյուղաջրերը չլցվեն գետեր, ջրամբարներ: Բայց, եթե կոյուղաջրերը չենք կարողանում մաքրել, դա չի նշանակում, որ կենցաղային աղբը պետք է լցնենք գետերի մեջ: Հնարավորության դեպքում կփորձենք այդ խնդիրը լուծել»,- հավաստեց մարզպետը:

Գյումրու շուկան ևս մարզպետի ուշադրության կենտրոնում է: «Եթե կարողանանք ցիվիլ շուկա սարքել, փողոցային առևտուրը կնվազի»,- ասաց նա:

Ասուլիսի ժամանակ ուշադրության կենտրոնում էին նաև գյուղացիներին հուզող խնդիրները, ոռոգման ջրի, պարարտանյութի ձեռքբերման, և այլն:

«Շիրակի մարզը ձեռք է բերել կառավարվող հրթիռային կայաններ, որոնք կբարձրացնեն կարկտապաշտպանության արդյունավետությունը: Սակայն դրանք այժմ փորձարկման փուլում են գտնվում: Վառելանյութի վերաբերյալ որևէ մեկից բողոք չենք ստացել: Շիրակի մարզը մեկ շնչին հասնող օգնության, ներդրումների ծավալով հավանաբար առաջ է անցել Արարատյան դաշտավայրից:

Խոշորացված համայնքների ծրագրով մեր երեք համայնքները՝ Սարապատը, Աշոցքը և Ամասիան, ներկայացրել են ներհամայնքային զարգացման ծրագրեր՝ ոռոգման ցանցի ընդլայնման, սերմերի զտման և ախտահարման կայանների ստեղծման, մյուս համայնքում՝ անասնակերի գործարանի ստեղծման: Այսպիսով Սարապատ համայնքում ոռոգման ներքին ցանցի կառուցման և սերմնազտման ու ախտահանման կայանի կառուցում է նախատեսվում, նույնը՝ Աշոցքում, Ամասիայում ներքին ցանցի վերանորոգում և անասնակերի գործարանի կառուցում: Դեռ ամբողջ հանրապետության մեջ առաջինը մեր մարզում է սա եղել»,- նշվեց ասուլիսի ընթացքում:

Այգիների պաշտպանության համար նախատեսված ցանցերի վերաբերյալ Ա.Խաչատրյանն ասաց, որ էժան վարկային միջոցներով գյուղացիները կկարողանան ձեռք բերել ցանցերը:

Այնուհետև Շիրակի մարզպետն անդրադառնում է գործարանների կառուցմանը:

«Ակնկալել, որ պետությունը կկառուցի զավոդ, ինչպես ժամանակին տեքստիլն է եղել, և մարդիկ կգնան-կաշխատեն, իրենց աշխատավարձերը կստանան, անկախ դրա տված արդյունքից՝ հաջո՞ղ է եղել, թե՞ անհաջող, աշխատավարձը չբավարարի, մի 10 մետր բիազ կծալեն, կդնեն գրպանը, դուրս կգան, կամ մսամթերքի կոմբինատից մի երկու հատ երշիկ կդնեն գրպանը, դուրս կգան, դրա ժամանակներն անցան: Սովետական Միության քայքայումը ցույց տվեց, որ դա չգործող մոդել է:

Փոխարենը՝ պետությունը պետք է ստեղծի պայմաններ, որպեսզի այդ գործարաններն առաջանան: Եվրամիության ծրագրով մոտ 1 միլիոն եվրո դրամաշնորհ է տրամադրվելու Ամասիայում գորգագործության կենտրոն ստեղծելու համար: Սակայն, որպեսզի լինի ոչխար, պետք է լինի կերային բազա, մեքենայացում, արոտներ, գոմեր: Մեր խնդիրն իրականում ոչ այնքան գումարի բացակայությունն է, որքան՝ ճիշտ բիզնես ծրագրերի»,- նշեց Արթուր Խաչատրյանը:

Անահիտ Սիմոնյան