«Քվեարկել եմ հանուն իշխանափոխության, երկրի ապագայի». Վարդան Օսկանյանի ոչ մի մատնահետք էլեկտրոնային սարքը չկարդաց

Այսօր առավոտյան Երևանի 9/59 ընտրատեղամասում քվեարկություն կատարեց «Օհանյան-Րաֆֆի-Օսկանյան» դաշինքի առաջնորդներից Վարդան Օսկանյանը՝ տիկնոջ հետ։ Նախկին արտգործնախարարի ոչ մի մատնահետք էլեկտրոնային սարքն այդպես էլ չկարողացավ կարդալ։

Լրագրողների հետ զրույցում Օսկանյանը նշեց, որ համակարգում մատնահետքերի բազա չկա, միակ հնարավորությունը, որ տալիս է սարքը, բազմակի քվեարկություններից խուսափելն է։

Նա նշեց, որ դեռևս շտաբ չի գնացել, ընտրախախտումների մասին տեղեկություններ չունի, սակայն հույս ունի, որ իշխանություններն այս անգամ կսթափվեն և կթողնեն, որ ազատ ընտրություն լինի։ 168.am-ի հարցին, թե ինչպե՞ս կմեկնաբանի ոստիկանապետ Վլադիմիր Գասպարյանի հայտարարությունը, թե հետընտրական ապօրինությունները, «ցանկացած արկածախնդրություն կպատժվի ոչ միայն օրենքով, այլև…», Վ.Օսկանյանը պատասխանեց, որ շատ են լսել այդ բոլորը։ Թե այդ «այլև»-ի տակ ի՞նչ է նկատի ունեցել Գասպարյանը, Օսկանյանը նշեց, որ դա իրեն պետք է հարցնել։

«Քվեարկել եմ՝ հանուն իշխանափոխության, երկրի ապագայի։ Այս իշխանություններով ապագա չկա»,- ասաց Օսկանյանը։

Մանրամասները՝ տեսանյութում