«Մենք էլ նստած հաշվում ենք, թե ՀՀԿ-ն իշխող մյուս կոալիցիոն անդամների՝ ՀՅԴ-ի հետ, որտեղ են կեղծելու ընտրությունները». Հրանտ Բագրատյան

«Մենք կարող ենք» կարգախոսը որդեգրած «Ազատ դեմոկրատներ» կուսակցությունը՝ Խաչատուր Քոքոբելյանի, Հրանտ Բագրատյանի և Ստյոպա Սաֆարյանի գլխավորությամբ, այսօր քարոզարշավ իրականացրեց Երևանի Կենտրոն համայնքում: Քարոզարշավը մեկնարկեց կուսակցության գրասենյակից, քայլերթով՝ մինչև Հյուսիսային պողոտա, որտեղ բացվեց կուսակցության նոր շտաբը:

«Մենք ավելի ենք կոնկրետացնում մեր ծրագրերը, և մարդիկ սկսում են տեսնել, որ շատ քաղաքական ուժեր պարզապես ծրագիր չեն ներկայացրել: Խոսքը, օրինակ, վերաբերում է Հանրապետական կուսակցությանը, որը ծրագիր չունի, պարզապես խոսքեր են, ոչ մի կոնկրետ բան: Մարդիկ սկսում են դա նկատել, մենք էլ նստած հաշվում ենք, թե Հանրապետականն իշխող մյուս կոալիցիոն անդամների՝ Դաշնակցության հետ, որտեղ են կեղծելու ընտրությունները: Միայն այդ տարբերակն ենք հաշվարկում»,- լրագրողների հետ ճեպազրույցի ընթացքում ասաց «Ազատ դեմոկրատներ» կուսակցության թեկնածու Հրանտ Բագրատյանը:

Անդրադառնալով իրենց կողմից ներկայացված նախընտրական ծրագրի դրույթներին՝ Հրանտ Բագրատյանը նկատեց՝ իրենց ծրագրում ներառված են բոլոր ոլորտները, ինչպես և պահանջում է Սահմանադրությունը, միաժամանակ հայտարարեց, որ իրենք ձգտում են մեծամասնության: Լրագրողի հարցին՝ իսկ եթե հանկարծ մեծամասնություն չկազմե՞ն, վերջինս պատասխանեց. «Ես եթե-ներով չեմ խոսում: Եթե մորաքույրս տղա լիներ, քեռիս կլիներ»:

Դաշինքներ կազմելու հեռանկարը Հրանտ Բագրատյանը չի բացառում, ասում է՝ ընտրություններից հետո կերևա, բացառում է, սակայն, այնպիսի դաշինքի ստեղծումը, որտեղ իշխող՝ Հանրապետական կուսակցությունը կարող է մեծամասնություն լինել, որովհետև ինքը համոզված է՝ բացառված է, որ նրանք մեծամասնություն կազմեն:

Կարդացեք նաև

Անդրադառնալով նախընտրական խոստումներին՝ Հրանտ Բագրատյանն ընդգծում է. «Մենք հստակ տեսնում ենք, որ ներդրումների մասին հայտարարությունները հեքիաթներ են՝ ամենուրեք կբարձրանա ինքնազբաղվածությունը, կզարգանա փոքր բիզնեսը. «Բոլորը նստած՝ սպասում ենք, թե պետությունը հես ա տիեզերանավ արտադրող գործարան կկառուցի, իրենք էլ այնտեղ կաշխատեն: Այդ ամենը սուտ է: Մենք ժողովրդին բացատրում ենք, որ դրանք բացարձակ սուտ և հորինված բաներ են: Ե՛վ Ռոբերտ Քոչարյանը, և՛ Սերժ Սարգսյանը 20 տարի շարունակ ներդրումներ են արել և աշխատատեղ ստեղծել, արդյունքում՝ աշխատատեղերի թիվը կտրուկ պակասել է: Այսօրվա Կառավարությունն էլ պետք է խորապես ընկալի, որ Հայաստանն ինչ-որ կորպորացիա չի, մարդիկ աշխատանք չունեն: Ոչ մի գործարանի կառուցում չի փրկելու իրավիճակը, սա բոլորը պետք է հստակ հասկանան»:

Թիվ 4 ընտրատարածքում «Ազատ դեմոկրատների» կողմից համամասնական և ռեյտինգային կարգով առաջադրված թեկնածու Նարեկ Այվազյանը լրագրողների հետ զրույցի ընթացքում ասաց. «Մենք սկսել ենք քարոզարշավը՝ ըստ սահմանված կարգի, և արդեն 15 օր շարունակ տարբեր հանդիպումների և միջոցառումների միջոցով ներկայացնում ենք մեր ծրագրերն ու գաղափարները: Ես կարծում եմ՝ մեր կուսակցության անունից բխող ազատական ու ժողովրդավարական արժեքների տարածումը կտա այն արդյունքը, որը մենք ակնկալում ենք: Մենք ոչ միայն կարծում ենք, որ հաղթահարելու ենք անցողիկ շեմը, այլև կազմակերպված աշխատանքի արդյունքում ապագա Ազգային ժողովում մեծամասնություն ենք կազմելու»:

Նույն կուսակցության անունից պատգամավորության թեկնածու առաջադրված Լիաննա Չիթչյանն էլ ընտրապայքարի մեջ է մտել հասարակական կյանքում կնոջ դերի արժևորման հաստատուն համոզմունքով. «Վերջին 10 տարիների ընթացքում ես աշխատում եմ նախադպրոցական տարիքի երեխաների, ինչպես նաև նրանց մայրերի հետ: Ավելի քան 10 տարի մենք դպրոցանպաստ ծրագիր ենք ծավալում՝ զուգահեռ ծանոթանալով նաև մայրիկների խնդիրներին, և գիտենք, որ նրանք զբաղվածության հետ կապված խնդիրներ ունեն: Հայաստանում կանայք աշխատանք գտնելու պարագայում էլ շատ դեպքերում ավելի ցածր են վարձատրվում, հաճախ դրանից ելնելով՝ հրաժարվում են առաջարկվող աշխատանքից: Մենք կցանկանայիք հայ կնոջն իրացված տեսնել նաև այլ ասպարեզներում, ոչ միայն տանը՝ երեխաների խնամքի և դաստիարակության հոգսերով ծանրաբեռնված»:

Տեսանյութեր

Լրահոս