«ՌԴ-ն չի խնդրում Արևմուտքին չեղարկել պատժամիջոցները». Լավրով
ՌԴ ԱԳՆ ղեկավար Սերգեյ Լավրովը Գերմանիայի ԱԳՆ ղեկավար Զիգմար Գաբրիելի հետ հանդիպման արդյունքներով հրավիրված մամուլի ասուլիսին հայտարարել է, թե Ռուսաստանը չի խնդրում Արևմուտքի երկրներին չեղարկել իր դեմ սահմանված պատժամիջոցները։
«Մեր արևմտյան գործընկերներն ասում են, թե չեն չեղարկի իրենց պատժամիջոցները (մենք չենք էլ խնդրում), քանի դեռ Ռուսաստանը չի կատարել Մինսկի պարտավորությունները»,- ասել է Լավրովը՝ ընդգծելով, որ մարտի 8-ին ԱՄՆ Պետդեպի ներկայացուցիչը ասել է, որ մինսկյան պարտավորությունները պետք է իրականացնեն բոլոր կողմերը։ «Պետք է կատարեն առաջին հերթին այն կողմերը, որոնք պայքարում են միմյանց դեմ՝ Դոնբասն ու Ուկրաինայի կառավարությունը»,- հայտարարել է Լավրովը։
Նա նաև անհիմն է որակել ՌԴ-ի դեմ բոլոր մեղադրանքները՝ կապված ցանցահենային հարձակումների հետ։
