«Միջազգային ֆեդերացիան Հռիփսիմե Խուրշուդյանի որակազրկման մասին որոշում չի կայացրել». Փաշիկ Ալավերդյան
Հայաստանի ծանրամարտի ֆեդերացիային գլխավոր քարտուղար Փաշիկ Ալավերդյանը լրագրողների հետ հանդիպման ժամանակ պարզաբանեց ծանրորդ Հռիփսիմե Խուրշուդյանի որակազրկման մասին լուրերը:
«Առաջին պարզաբանումը եղել է հունիսին, և առաջարկ ենք ստացել երկրորդ սրվակը բացել: Քանի որ չունենք մասնագետ, ով կգնար, կնստեր և կմասնակցեր այդ գործընթացին, մենք համաձայնեցինք նրանց որոշման հետ: Ընդհանուր առմամբ հավաքվել է 170 մարդ տարբեր երկրներից, ովքեր հետևել են գործընթացին: Յուրաքանչյուր մարզաձևում որակազրկման հետ կապված որոշում կայացնում է ֆեդերացիան: Իսկ Մալազիայում ֆեդերացիայի նիստի ժամանակ ասվել է, որ միայն մեդալը պետք է վերադարձնենք: Միջազգային օլիմպիական կոմիտեն չի կարող որակազրկել մարզիկին: Մենք համաձայնվել ենք նրանց որոշ ման հետ, սակայն որակազրկման մասին որոշում պետք է կայացնի միջազգային ֆեդերացիան, իսկ նիստի ժամանակ նման որոշում չի կայացվել»,-«Արմենպրես»-ի մամուլի սրահում կայացած ասուլիսի ժամանակ շեշտեց Ալավերդյանը:
Միջազգային օլիմպիական կոմիտեն հրապարակել է 2012 թվականի Լոնդոնի Օլիմպիական խաղերի դոպինգ նմուշների վերանայված արդյունքները: Հրապարակված ցուցակում ընդգրկված է Հռիփսիմե Խուրշուդյանը (+75 կգ), ով պետք է վերադարձնի օլիմպիական բրոնզե մեդալը:
