Մեր երկրին մոտ ժամանակներս սպառնում է իրական տնտեսական աղետ. Լևոն Տեր-Պետրոսյան
Հայաստանի Հանրապետության առաջին նախագահ Լևոն Տեր-Պետրոսյանը ահազանգ է հնչեցրել՝ կապված երկրի տնտեսական վիճակի հետ։ iLur.am-ը ներկայացրել է Լ. Տեր-Պետրոսյանի խոսքը:
«Լևոն Տեր-Պետրոսյան. Ահազանգ
Մինչ վարչախումբն զբաղված է կառավարման համակարգի և ընտրական գործընթացի բարեփոխման թատերական արարողություններով` ակնհայտորեն միտված ոչ այնքան պետության առողջացմանը, որքան սեփական իշխանության ամրապնդմանն ու հավերժացմանը, մեր երկրին մոտ ժամանակներս սպառնում է իրական տնտեսական աղետ` այս անգամ թաքնված ԴԵՖՈԼՏ «բարեհունչ» անվան տակ»:
Իսկ ի՞նչ է դեֆոլթը։
Դեֆոլթ՝ նշանակում է պարտքի գծով պարտավորությունները կատարելու անկարողություն։ Դեֆոլթ հայտարարելով՝ երկիրը (կամ ընկերությունը) խոստովանում է, որ ֆինանսական ճգնաժամի մեջ է և չի կարող մարել պարտքի գծով պարտավորությունները։
Սա նշանակում է, որ Լևոն Տեր-Պետրոսյանի համոզմամբ՝ Հայաստանը չի կարողանալու սպասարկել պետական պարտքը և հայտարարելու է այդ մասին։
Հետաքրքիրն այն է, որ երեկ այս թեմայով ասուլիս էր տալիս ՀՀ ֆինանսների նախարարության պետական պարտքի կառավարման վարչության պետ Արշալույս Մարգարյանը՝ նշելով, որ Հայաստանը դասվում է նվազ պարտքային բեռ ունեցող երկրների շարքին, և պետական պարտքը ամբողջությամբ կառավարելի է՝ այդ առումով խնդիրներ չկան։
Տեղեկացնենք նաև, որ 2016 թվականի բյուջեով պետական պարտքի սպասարկմանը պետք է ուղղվի շուրջ 100 մլրդ դրամ, իսկ 2017 թվականին, ըստ պետբյուջեի նախագծի, մոտ 120 մլրդ դրամ։ Քիչ հավանական է թվում, որ այս բեռը դեֆոլթ հայտարարելու պատճառ դառնա։
