Վրաստանի վարչապետը կայցելի Անկարա
Վրաստանի վարչապետ Գեորգի Կվիրիկաշվիլիի՝ հուլիսի 19-ին Անկարա այցի շրջանակում տեղի կունենա ռազմավարական համագործակցության վրաց-թուրքական խորհրդի առաջին նիստը, հայտնում է «Գրուզիա օնլայնը»:
Տվյալ նիստն անցկացնելու պատրաստակամությունը Վրաստանի վարչապետը քննարկել է իր թուրք գործընկերոջ՝ Բինալի Յըլդըրըմի հետ հեռախոսազրույցի ընթացքում:
Կողմերը կարևորել են այդ այցը և պատրաստակամություն հայտնել քննարկել ռազմավարական գործընկերության բոլոր ուղղությունները, ասվում է Վրաստանի կառավարության մամուլի ծառայության հաղորդագրության մեջ:
Կվիրիկաշվիլին իր ցավակցություններն է հայտնել Թուրքիայի ժողովրդավարության պաշտպանության համար իրենց կյանքը զոհած մարդկանց ընտանիքներին:
Նա խաղաղություն և կայունություն է մաղթել Թուրքիայի ժողովրդին և կառավարությանը:
Կվիրիկաշվիլին նշել է, որ ուժեղ և ժողովրդավարական Թուրքիան կարևոր է տարածաշրջանի զարգացման և կայունության համար և իր աջակցությունն է հայտնել ժողովրդավարական ճանապարհով ընտրված Թուրքիայի իշխանություններին:
Թուրքիայի վարչապետն ընդգծել է, որ Թուրքիայում իրավիճակը կայունացել է, և Վրաստանի հետ համագործակցությունը շարունակվելու է:
