«Ժամանակն է, որ Հայաստանն ունենա կիբեռ-զենքեր և կիբեռ-բանակ»

Երևանում մեկնարկել է ամենամյա՝ թվով 9-րդ, «Խելացի լուծումներ՝ խելացի բիզնեսի համար» խորագիրը կրող «ԴիջիԹեք» բիզնես ֆորումը: Այն կշարունակվի նաև վաղը: Այս տարի ֆորումն առանձնանում է շատ խիտ օրակարգով: Ֆորումի ընթացքում քննարկվելու են ռազմաարդյունաբերության և անվտանգության հիմնախնդիրները, տնտեսության տեխնոլոգիական զարգացումը:

Ֆորումը քննարկելու է Հայաստանում մի նոր իրավիճակ ու փորձելու է հասկանալ, թե ինչպես կազմակերպել Հայաստանի նոր ռազմաարդյունաբերությունը: Այս մասին «ԴիջիԹեք» բիզնես ֆորումին նվիրված ասուլիսում նշել է Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը:

Բիզնես ֆորումը փորձելու է պատասխանել այն հարցին, թե ինչպես Հայաստանում գործող ընկերությունների ներուժն օգտագործել կիբեռ անվտանգությունն ապահովելու համար: Քննարկումների ընթացքում հստակ ընդգծվելու է, թե ինչ պետական քայլերի անհրաժեշտություն կա:

Ըստ Կարեն Վարդանյանի՝ ֆորումի հիմնական նպատակներից մեկը նոր առաջարկությունների քննարկումն է: Ֆորումի ընթացքում հավաքվելու են նոր ու հետաքրքիր առաջարկություններ, որոնք քննարկվելուց և մշակվելուց հետո կներկայացվեն կառավարությանը:

Ֆորումի հիմնական թեմաներից մեկը՝ ռազմաարդյունաբերության հիմնախնդիրը, մշակվել և առաջնային է դարձել ապրիլին տեղի ունեցած քառօրյա պատերազմից հետո: Ֆորումի ընթացքում թե՛ սկսնակ, թե՛ փորձառու ՏՏ ընկերությունները կներկայացնեն իրենց գաղափարները և կառաջարկեն իրենց լուծումները:

Ինֆորմացիոն տեխնոլոգիաների ձեռնարկությունների միության նախագահ Ալեքսանդր Եսայանը նշում է, որ միությունը լրջորեն զբաղվում է ռազմաարդյունաբերական հարցերով:

«Մենք ունենք 300 մասնագետ, որոնք կարող են աջակցություն ցուցաբերել թե մասնագիտական, թե ծրագրային լուծումներով: Հուսով ենք, որ ֆորումի ընթացքում կհասնենք որոշակի արդյունքների»,- նշել է Ալեքսանդր Եսայանը:

«ԴիջիԹեք» բիզնես ֆորումում քննարկվելու է նաև ֆինանսական համակարգի, կիբեռ անվտանգության հարցերը:

«2015-ը տարի էր, երբ ՏՏ-ն Հայաստանում մտավ արտադրության ոլորտ, իսկ լուծումները սկսեցին փոխել մարդկանց կենցաղը»,- նշում է մեդիափորձագետ Սամվել Մարտիրոսյանը:

Ըստ Սամվել Մարտիրոսյանի՝ հիմա Հայաստանը կիբեռ անվտանգությունն օգտագործում է ոչ միայն՝ պաշտպանվելու, այլև՝ հարձակվելու համար: Հենց այդ պատճառով էլ ժամանակն է, որ Հայաստանն ունենա կիբեռ-զենքեր և կիբեռ-բանակ:

Այս տարի «ԴիջիԹեք» բիզնես ֆորումն ունենալու է միայն տեսական հատված: ԻՄՁՄ գործադիր տնօրեն Կարեն Վարդանյանը նշում է, որ սրահների վերանորոգման պատճառով այս տարի չեն լինի ցուցադրություններ, սակայն այդ բացը կլրացվի մյուս տարիներին:

Սիրարփի Աղաբաբյան