Վահան Մարտիրոսյանի ժամանումը կազմակերպելու օպերացիան տևել է 10 օր. ադրբեջանցի իրավապաշտպան
Վահան Մարտիրոսյանի ժամանումը կազմակերպելու «օպերացիան» Բաքու տևել է 10 օր: Այդ ուղղությամբ մեծ աշխատանք է կատարել Ադրբեջանի Միլի մեջլիսի պատգամավոր Ազայ Գուլիևը: Այս մասին Haqqin.az-ին ասել է իրավապաշտպան Նովելլա Ջաֆարօղլուն՝ մեկնաբանելով «Ներազգային ազատագրական շարժում» նախաձեռնության ղեկավարի փախուստն Ադրբեջան:
«Ես չեմ դիմել Ազգային անվտանգության ծառայություն, ես դիմել եմ միայն Ազայ Գուլիևին, ով հենց սկզբից կապի մեջ է մտել Ադրբեջանի համապատասխան կառույցների հետ, որոնք օգնություն են ցուցաբերել Մարտիրոսյանին Բաքու տեղափոխվելու հարցում: Ես իրավասու չեմ պատասխանել այլ հարցերի, կարծում եմ՝ այդ մասին անձամբ Մարտիրոսյանը կպատմի»,- ասել է Ջաֆարօղլուն:
Ինչպես ավելի վաղ տեղեկացրել էինք, «Interfax-Ադրբեջանը» հայտնել էր, որ «Ներազգային ազատագրական շարժում» նախաձեռնության ղեկավար Վահան Մարտիրոսյանին քաղաքական ապաստան տրամադրելու գործում օգնություն է ցուցաբերել իրավապաշտպան Նովելլա Ջաֆարօղլուն:
«Մեր վրացի գործընկերներն ինձ նամակ են հանձնել, որտեղ ասվում է, որ Վահան Մարտիրոսյանն ու նրա կինը ծեծի են ենթարկվել, ինչի հետևանքով կինը կորցրել է երեխային»,- ասել էր նա:
Հիշեցնենք, որ վաղը ցերեկը Բաքվում տեղի կունենա Վահան Մարտիրոսյանի ու նրա կնոջ մամլո ասուլիսը:
Ավելի վաղ APA գործակալությունը հայտնել էր, որ Վահան Մարտիրոսյանը Ադրբեջանից քաղաքական ապաստան է խնդրել:
