Իսրայելի նոր կառավարությունը երդում է տվել
Բրիտանական Reuters լրատվական գործակալության փոխանցմամբ` երդում է տվել Իսրայելի նոր կառավարությունը, որը ձևավորել է վարչապետ Բենիամին Նեթանյահուն ու խորհրդարանում հավանության է արժանացել նվազագույն մեծամասնությամբ:
120 պատգամավորներից ծայրահեղ աջ և ծայրահեղ կրոնական կառավարությանն աջակցություն է հայտնել 61 մարդ: 59 պատգամավոր դեմ է արտահայտվել նոր կառավարության կազմին:
Վարչապետը փորձել է խորհրդարանում ներկայացնել նոր կառավարությանը, սակայն արդեն վայրկյաններ անց նրա ելույթն ընդհատվել է ընդդիմության ծաղրանքների ու աղաղակների պատճառով:
Ընդդիմությունը նման կերպ է արձագանքել Նեթանյահուի այն հայտարարությանը, որ այս կառավարությունն ապահովելու է անվտանգություն ու աշխատելու է խաղաղության հաստատման ուղղությամբ: Նեթանյահուն նոր կառավարությունը ձևավորել է մայիսի 7-ին:
