Ինչքանով զգացմունքային կլինի ՀՀ-ԵՄ «տանգոն»` կախված է նաև Հայաստանից. Եժի Նովակովսկի
«ԵՄ-ն ցանկանում է «տանգո պարել» Հայաստանի հետ»,- այսօր Մամուլի ազգային ակումբում լրագրողների հետ հանդիպման ժամանակ այս մասին ասաց ՀՀ-ում Լեհաստանի արտակարգ և լիազոր դեսպան Եժի Նովակովկին` անդրադառնալով Ռիգայում կայանալիք «Արևելյան գործընկերության» գագթնաժողովին Հայաստանի մասնակցությանը:
Լեհ դեսպանը հույս հայտնեց, որ Ռիգայում կայանալիք Արևելյան գործընկերության գագաթնաժողովին Հայաստանը կներկայանա ամենաբարձր մակարդակով և կհաջողվի հասնել արդյունքի: «Լեհաստանում մի լավ ասացվածք կա, որ տանգոն պար է երկուսի համար, այսինքն` երկու անձ է հարկավոր այդ պարի համար: ԵՄ հանձնակատար Հանը Հայաստան կատարած իր վերջին այցի ընթացքում պատրաստակամություն հայտնեց պարել Հայաստանի հետ: Ինչքանով զգացմունքային կլինի այդ պարը՝ կախված կլինի զուգընկերոջից, այսինքն` նաև Հայաստանից»,- ասաց Լեհաստանի դեսպանը` փորձելով բացատրել, թե ինչ կարելի է ակնկալել ԵՄ-ՀՀ համագործակցությունից Ռիգայի գագաթնաժողովում:
