Կանադան Ռուսաստանին կոչ է արել իր զորքերն ու տեխնիկան դուրս բերել Ուկրաինայի արևելքից
Ուկրաինական UNIAN լրատվական գործակալության փոխանցմամբ՝ Կանադան Ռուսաստանին կոչ է արել իր զորքերն ու տեխնիկան դուրս բերել Ուկրաինայի արևելքից և չխափանել իրավիճակի խաղաղ կարգավորման հնարավորությունը:
Այս մասին նշված է Կանադայի արտգործնախարար Ռոբ Նիկոլսոնի տարածած հայտարարությունում: Դրանում նշված է, որ Կանադան վճռականորեն դատապարտում է Ռուսաստանի և նրա աջակցությունը վայելող զինյալների կողմից Մինսկյան համաձայնագրերի մշտական խախտումները.
«Ռուսաստանը շարունակում է խախտել հրադադարի ռեժիմը և Ուկրաինայի արևելքում պահում է բանակ ու տեխնիկա: Այդօրինակ գործողությունները հանդիսանում են Մինսկյան համաձայնագրերի ակնհայտ խախտում և սպառնալիքի տակ են դնում նրանց կենսունակությունը»:
Նիկոլսոնի խոսքերով՝ Կանադան դատապարտում է Ուկրաինայի հետ սահմանի երկայնքով Ռուսաստանի զորքերի ծավալումը վերջին ամիսներին, ինչը խաթարում է տարածաշրջանի կայունությունը: Կանադայի արտգործնախարարն ընդգծել է, որ Մինսկյան համաձայնագրերը կարող են արդյունք տալ միայն դրանց գործարկման պայմաններում:
