Կրեմլում հուսով են, որ Անկարան ըմբռնումով կմոտենա Պուտինի երևանյան այցին. Ուշակով
Ռուսական ТАСС լրատվական գործակալության փոխանցմամբ՝ Կրեմլում հուսով են, որ Անկարան ըմբռնումով կմոտենա Ռուսաստանի նախագահ Վլադիմիր Պուտինի կողմից Երևան այցելելուն՝ կապված Հայոց ցեղասպանության 100-րդ տարելիցի հետ: Այս մասին լրագրողների հետ զրույցում հայտարարել է Ռուսաստանի նախագահի օգնական Յուրի Ուշակովը.
«Այդ հաշվով զրույց է տեղի ունեցել մեր երկու երկրների առաջնորդների միջև, Ռեջեփ Թայյիփ Էրդողանին քաջ հայտնի են եղել Հայաստան այցելելու Պուտինի պլանները: Նաև քաջ հայտնի է, որ մեր երկիրը ապրիլի 24-ին բավական բարձր մակարդակով ներկայացված կլինի Թուրքիայում»:
Ուշակովը հիշեցրել է, որ ապրիլի 24-ին Թուրքիայում Ռուսաստանը ներկայացնելու է Պետդումայի նախագահ Սերգեյ Նարիշկինը: Կրեմլի ներկայացուցիչն ընդգծել է, որ Պուտինը Երևան է մեկնում Հայաստանի նախագահ Սերժ Սարգսյանի հրավերով: Ուշակովը մանրամասնել է, որ Պուտինը Երևան է մեկնելու հինգշաբթի երեկոյան:
Ուշակովը հիշեցրել է, որ Ռուսաստանի նախագահն ավելի վաղ արդեն իսկ այցելել է Ծիծեռնակաբերդի համալիր: Ուշակովը մանրամասնել է, որ դա տեղի է ունեցել 2001 թվականի սեպտեմբերին և 2013 թվականի դեկտեմբերին Հայաստան կատարած այցերի ժամանակ.
«Որքան որ տեղյակ ենք, հիշատակի միջոցառումներին ներկա են գտնվելու ավելի քան 20 երկրների ներկայացուցիչներ, այդ թվում նաև Ֆրանսիայի, Կիպրոսի, Սերբիայի նախագահները, որոնք, ինչպես և մեր նախագահը, ելույթ կունենան հիշատակի միջոցառումների ժամանակ:
Այս անգամ Պուտինի երևանյան այցի ծրագիրը բաղկացած է Ծիծեռնակաբերդի հուշահամալիր այցելելուց, միջոցառման ժամանակ ելույթ ունենալուց, ապա Հայաստանի նախագահի անունից կտրվի պետական ճաշ:
Հայոց ցեղասպանության հիշատակի օրն ավանդաբար բազմաթիվ տարիներ արդեն իսկ նշվում է ապրիլի 24-ին, տարբեր գնահատականներով՝ 1915-1916 թվականներին Թուրքիայում ոչնչացվել է ավելի քան 1.5 միլիոն հայ, ավելի քան 600.000 մարդ հարկադրաբար վտարվել է դեպի Միջագետքի անապատներ, մոտ 300.000 հայ էլ ապաստան է գտել Ռուսաստանում:
100-րդ տարելիցը պատմական ու հոգևոր մեծ նշանակություն ունի մեզ համար դաշնակցային Հայաստանի ու Հայաստանի բարեկամական ժողովրդի, Ռուսաստանի հայկական համայնքի համար, որը կազմում է մոտ 3 միլիոն մարդ:
Մեզ մոտ՝ Ռուսաստանում, նույնպես այդ ժամկետը առաջացնում է լայն արձագանք. Ռուսաստանի հարյուրավոր քաղաքներում կանցկացվեն ավելի քան 2000 հիշատակի ակցիաներ, Մոսկվայում կբացվի ցուցահանդես»:
Ուշակովը հավելել է, որ Հայոց ցեղասպանության հարցում Ռուսաստանի դիրքորոշումը քաղաքական մակարդակով իր արտացոլումն է գտել 1995 թվականի ապրիլին և 2005 թվականի ապրիլին Պետդումայի արած հայտարարություններում:
Ուշակովի խոսքերով՝ ՌԴ Պետդուման մտադիր է հատուկ հայտարարություն ընդունել ապրիլի 24-ին 100-րդ տարելիցի կապակցությամբ:
