Պակիստանի նախագահը վաղը քառօրյա պաշտոնական այցով կժամանի Ադրբեջան
Ադրբեջանական Turan լրատվական գործակալության փոխանցմամբ՝ Պակիստանի նախագահ Մամնուն Հուսեինը վաղը պաշտոնական քառօրյա այցով ժամանելու է Ադրբեջան: Այցն իրականացվում է Ադրբեջանի նախագահ Իլհամ Ալիևի հրավերով:
Պակիստանի նախագահին ուղեկցելու է պաշտոնատար անձանց ու գործարարների մեծ խումբը: Բանակցությունների թեման են հանդիսանալու տնտեսական, առևտրային, կրթական, գիտական ու մշակութային ոլորտներում համագործակցությունը:
Ակնկալվում է, որ բանակցությունների արդյունքներով կստորագրվի 4 երկկողմ փաստաթուղթ: Այցի շրջանակներում կանցկացվի նաև գործարար ֆորում:
Հիշեցնենք, որ Հայաստանի Հանրապետության և Պակիստանի Իսլամական Հանրապետության միջև դիվանագիտական հարաբերություններ հաստատված չեն:
