ԱՄՆ-ում սպիտակամորթ ոստիկանը սպանել է մերկ աֆրոամերիկացու
Ամերիկյան Associated Press լրատվական գործակալության փոխանցմամբ՝ ԱՄՆ Ջորջիա նահանգի Ատլանտա քաղաքում ոստիկանը կրակել և սպանել է մերկ սևամորթ տղամարդու, ով, ամենայն հավանականությամբ, չի եղել զինված: Այս մասին հայտնել է Դե Կալբ շրջանի շերիֆ Սեդրիկ Ալեքսանդերը:
Վերջինիս խոսքերով՝ ոստիկանության սպան ահազանգից հետո եկել է տներից մեկի մոտ, որի բնակիչները զանգահարել էին ոստիկանություն և հայտնել, որ անհայտ, մերկ տղամարդը թակում է իրենց դուռն ու սողում է գետնի վրայով: Շերիֆը հայտարարել է, որ աֆրոամերիկացին չի ենթարկվել ոստիկանի հրամանին ու փախուստի է դիմել:
Նախազգուշական երկու կրակոցներից հետո ոստիկանը կրակել է նրա վրա: Աֆրոամերիկացին սպանվել է տեղում: Զոհվածի ինքնության մասին դեռ ոչինչ չի հաղորդվում: Հայտնի է միայն, որ նրա վրա կրակած ոստիկանը սպիտակամորթ է: Իշխանությունները սկսել են հետաքննել միջադեպը:
