Մենք ցանկանում ենք մեր նավթն արտահանել Թուրքիայի տարածքով. Իրաքի վարչապետ
Թուրքական Dünya Bülteni լրատվական կենտրոնի փոխանցմամբ` Իրաքի վարչապետ Հայդար ալ-Աբադին երեկ ժամանել է Անկարա, ուր նրան ընդունել է Թուրքիայի վարչապետ Ահմեթ Դավութօղլուն:
Հանդիպումից հետո կազմակերպված համատեղ մամուլի ասուլիսի ժամանակ Իրաքի վարչապետը հայտարարել է, որ իրենք ցանկանում են, որ իրաքյան նավթը փոխադրվի Թուրքիայի տարածքով` Եվրոպային վաճառելու համար:
Դավութօղլուն իր հերթին հայտարարել է, որ Թուրքիայի ու Իրաքի փոխհարաբերությունները պատմական են: Աբադին հայտնել է, որ իրենք սկսել են «Իսլամական պետությունից» ազատագրել իրենց տարածքները: Նա ընդգծել է, որ իրենք ահաբեկչական որևէ կազմակերպության թույլ չեն տա վնասել Թուրքիային.
«Մեր տնտեսությունը, մեր անվտանգությունը, մեր դեմ ուղղված սպառնալիքներն ընդհանուր են: Մենք ցանկանում ենք մեր նավթն արտահանել Թուրքիայի տարածքով: Մենք ցանկանում ենք փոխադարձաբար զարգացնել մեր տնտեսությունները»:
