Վրացական ու ռուսական ավիաընկերություններին թույլատրվել է իրականացնել շաբաթական 18-ական չվերթ
Новости-Грузия լրատվական գործակալության փոխանցմամբ` Վրաստանի ու Ռուսաստանի ավիացիոն իշխանությունների ներկայացուցիչների միջև անցկացված տեխնիկական խորհրդակցությունների արդյունքներով որոշվել է վրացական ու ռուսական ավիաընկերություններին մինչև հաջորդ տարվա հունվարի վերջն իրավունք տալ շաբաթական 18-ական չվերթ իրականացնել «Մոսկվա-Թբիլիսի-Մոսկվա» ուղղությամբ:
Այս մասին հայտնել է Վրաստանի էկոնոմիկայի ու կայուն զարգացման նախարարության մամլո ծառայությունը: Թբիլիսիում համապատասխան բանակցություններն անցկացվել են դեկտեմբերի 24-25-ին: Դրանցում քննարկվել են նաև այլ հարցեր` թռիչքների հաճախականությունը, նշանակման վայրերի հստակեցումը և այլն:
Դեկտեմբերի 10-ին վրացական Airzena – Georgian Airways ավիաընկերության աշխատակիցները գործադուլ էին կազմակերպել, քանի որ Վրաստանի իշխանությունները ռուսական ավիափոխադրողներին թույլատրել էին առաջնահերթ կարգով չվերթներ իրականացնել Ռուսաստանի ու Վրաստանի միջև:
