Թուրքիան սիրիական ընդդիմության ռազմական ուսուցման գործընթացը կարող է սկսել մարտին. Չավուշօղլու
Բրիտանական Reuters լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն հայտարարել է, որ Թուրքիան կարող է սիրիական չափավոր ընդդիմության ռազմական ուսուցման ու սպառազինման գործընթացը սկսել մարտին:
Հոկտեմբերին ԱՄՆ պետդեպարտամենտը հայտարարել էր, որ Թուրքիան պատրաստ է աջակցել նախագահ Բարաք Օբամայի ռազմավարության մաս կազմող այդ ծրագրին: Այդ ռազմավարության էությունը կայանում է Սիրիայում տեղական ուժերով «Իսլամական պետության» զինյալներից բխող վտանգը զսպելում:
Չավուշօղլուն հայտարարել է, որ իրենք աջակցում են հրադադարի ուղղությամբ յուրաքանչյուր գործողությանը, ինչը կօգնի վերջ դնել Սիրիական հակամարտությանը, մարդկանց տառապանքներին: Սիրիական հակամարտությունը շարունակվում է ավելի քան 3.5 տարի և խլել է ավելի քան 200.000 մարդու կյանք:
