Թուրքիայի ու Ռուսաստանի մերձեցումը համապատասխանում է Ադրբեջանի շահերին. Խալաֆ Խալաֆով
Ադրբեջանական APA լրատվական գործակալության փոխանցմամբ՝ Ադրբեջանի փոխարտգործնախարար Խալաֆ Խալաֆովը մեկնաբանել է ռուս-թուրքական հարաբերություններում նկատվող մերձեցումը.
«Վերջին շրջանում նկատվող Թուրքիայի ու Ռուսաստանի մերձեցումը համապատասխանում է Ադրբեջանի շահերին, և մենք ողջունում ենք այն: Ռուսաստանն ու Թուրքիան Ադրբեջանի հարևաններն են և տարածաշրջանի ազդեցիկ երկրները: Ադրբեջանը երկու երկների հետ էլ ունի վստահելի հարաբերություններ: Ելնելով դրանից՝ այդ երկու երկրների հարաբերությունների բարելավումը համապատասխանում է Ադրբեջանի շահերին»:
Երբ Խալաֆովին հարցրել են, թե ռուս-թուրքական հարաբերությունների մերձեցումը ինչպես կարող է ազդել Ղարաբաղյան հակամարտության կարգավորման վրա, Խալաֆովը պատասխանել է. «Տարածաշրջանի հակամարտությունների կարգավորումը բխում է յուրաքանչյուրի շահերից:
Եթե հաշվի առնենք, որ Ռուսաստանը միջնորդ է հանդիսանում Ղարաբաղյան հակամարտության կարգավորման հարցում, իսկ Թուրքիան սահմանակցում է Հայաստանի հետ, ապա նշանակում է, որ երկու երկրների միջև հարաբերությունների բարելավումը կարող է դրականորեն անդրադառնալ հակամարտության կարգավորման վրա: Մենք սպասում ենք դրան»:
