Երիտասարդ հանրապետականների համար մեկնարկել են ռուսերենի խորացված պարապմունքները

Հայաստանի հանրապետական կուսակցության երիտասարդական կազմակերպությունն իր անդամների համար կազմակերպում է օտար լեզուների անվճար դասընթացներ։ Հունիսի 19-ին երիտասարդ հանրապետականների համար մեկնարկեցին ռուսերենի խորացված պարապմունքները։ Այն իրականացվում է «Ռուսհամագործակցության» հետ համատեղ։

ՀՀԿ երիտասարդական խորհրդի անդամ Հայկ Մամիջանյանը տեղեկացրեց, որ դասընթացի բոլոր մասնակիցները թեստավորվել են, և պարապմունքների ժամանակ յուրաքանչյուրին կցուցաբերվի անհատական մոտեցում։ Դասերն անցկացվելու են շաբաթական երկու անգամ պարբերականությամբ։

Ըստ Հայկ Մամիջանյանի՝ ռուսերենն ինֆորմացիայի ստացման գործիքներից մեկն է՝ հաշվի առնելով ռուսալեզու գրականության մեծ ծավալը գրեթե բոլոր մասնագիտական ոլորտներում։ «Կուսակցությունը կատարում է հսկայական ներդրում իր կադրային ռեսուրսի վրա՝ ձևավորելով օտար լեզուների իմացությամբ մրցունակ երիտասարդներ, ովքեր կկարողանան իրենց գիտելիքներն օգտագործել ի նպաստ պետության»,- նշեց Հայկ Մամիջանյանը։

Հայաստանում «Ռուսհամագործակցության» ներկայացուցչության ղեկավար Մարկ Կալինինը կարևորեց նման նախագիծը, քանի որ դրա շրջանակներում ներգրավված են երիտասարդ, հեռանկարային առաջնորդներ։ Նա ընդգծեց, որ դասընթացավարի կողմից հաշվի կառնվեն լսարանի առանձնահատկությունները, պահանջներն ու ցանկությունները։ Պարապմունքների ժամանակ շեշտը դրվելու է խոսակցական ռուսերենի զարգացման վրա։

Նշենք, որ այս պահին ՀՀԿ երիտասարդական կազմակերպության անդամների համար ընթանում են նաև անգլերենի դասընթացներ։ Մեկ շաբաթվա ընթացքում կտրվի գերմաներենի անվճար դասընթացների մեկնարկը։

ՀՀԿ երիտասարդական կազմակերպություն