Հյուսիսային Իրաքի քրդական ինքնավարության բանակն իր վերահսկողությունն է հաստատել Քիրքուքի վրա
Բրիտանական Reuters լրատվական գործակալության փոխանցմամբ՝ Հյուսիսային Իրաքի քրդական ինքնավարության բանակը՝ Փեշմերգան (թարգմանաբար՝ մահապարտ) իր վերահսկողության տակ է առել Իրաքի հյուսիսում գտնվող Քիրքուք քաղաքը:
Քրդերի հաղորդմամբ՝ ներկա դրությամբ քաղաքում չի մնացել կառավարական բանակի որևէ զինծառայող, քանի որ կառավարական բանակը «Լևանտում ու Իրաքում իսլամական պետություն» խմբավորման զինյալների ճնշման ներքո նահանջում է դեպի հարավ:
Սրանից առաջ հաղորդվել էր, որ իսլամականները գրավել էին Նինվե նահանգի կենտրոն Մոսուլ քաղաքը և Սալահ ադ-Դին նահանգի կենտրոն Տիկրիտը: Վերջին տվյալներով՝ մարտերն ընթանում են Իրաքի մայրաքաղաք Բաղդադից 125 կիլոմետր հեռավորության վրա ընկած Սամարրա քաղաքի մոտ:
Իրաքյան բանակը նահանջում է, բազմաթիվ զինծառայողներ գերի են ընկել: Մոսուլի ու Տիկրիտի գրավումից հետո լուրեր էին շրջանառվում, որ իսլամականները մտադիր են գրավել նաև Քիրքուքը:
