Իրաքում այսօրվա ահաբեկչությունների հետևանքով զոհվել է 23 մարդ
Ամերիկյան Associated Press լրատվական գործակալության փոխանցմամբ՝ Իրաքում պայթյուն է գրանցվել Քրդստանի Հայրենասիրական միություն (Patriotic Union of Kurdistan) և Քրդստանի Կոմունիստական կուսակցության (Kurdistan Communist Party) գրասենյակների մոտ:
Բաղդադից 170 կիլոմետր դեպի հյուսիս ընկած Թուզ-Խորմատո քաղաքում իրականացված ահաբեկչության հետևանքով զոհվել է 21 և վիրավորվել է առնվազն 140 մարդ: Ոստիկանության հաղորդմամբ՝ ահաբեկչությունը պայթուցիկով լեցուն ավտոմեքենայով իրականացրել է մահապարտ-ահաբեկիչը:
Նա մխրճվել է քաղաքական կուսակցությունների գրասենյակների կողքին գտնվող ոստիկանատան շենքի մեջ: Ուշագրավ է, որ Քրդստանի Հայրենասիրական միության հիմնադիրը Ջալալ Թալաբանին է, ով 2005 թվականից զբաղեցնում է Իրաքի նախագահի պաշտոնը:
Այսօր պայթուցիկով լեցուն մեկ այլ ավտոմեքենա էլ պայթել է Բաղդադի հարավային անցակետում: Դրա հետևանքով զոհվել է 2 զինծառայող, ևս 5-ը վիրավորվել են:
