Թուրքիայի պաշտպանության նախարարը մայիսին կայցելի Նախիջևան. APA
Ադրբեջանական APA լրատվական գործակալության փոխանցմամբ՝ Թուրքիայի պաշտպանության նախարար Իսմեթ Յըլմազն այցելելու է Նախիջևան: Այս մասին գործակալությանը հայտնել է Կուալա Լումպուրում DSA – 2014 ցուցահանդեսին մասնակցող Թուրքիայի պաշտպանության նախարարության պատվիրակությունը:
Նշվում է, որ Իսմեթ Յըլմազը պլանավորել է Նախիջևան այցելել մայիսին: Այցի նպատակների մասին ոչինչ չի հաղորդվում:
Հիշեցնենք, որ Թուրքիայի զինված ուժերի Գլխավոր շտաբի պետ, բանակի գեներալ Նեջդեթ Օզելն ապրիլի 1-ին ժամանել էր Ադրբեջան: Նախորդ տարեվերջին Անկարայում տեղի էր ունեցել Նեջդեթ Օզելի և Ադրբեջանի պաշտպանության նախարար Զաքիր Հասանովի հանդիպումը:
