Այս տարի Հայաստանը չի դառնա Մաքսային միության անդամ
Իշխանությանը մոտ կանգնած մեր աղբյուրները վստահեցնում են, որ այս տարի Հայաստանի անդամակցությունը Մաքսային միությանը բացառվում է: Պատճառը Ղազախստանի արմատական դիրքորոշումն է Լեռնային Ղարաբաղի հարցում, որը նույնիսկ Ռուսաստանի իշխանություններն անհաղթահարելի խոչընդոտ են համարում: Ղազախստանը պահանջում է, որպեսզի Հայաստանի և Լեռնային Ղարաբաղի միջև մաքսակետ դրվի, այլապես սպառնում է արգելել Հայաստանում արտադրված ապրանքների մուտքն իր տարածք:
Հայ պաշտոնյաներն ասում են, որ Մաքսային միությանը նվիրված քննարկումների ժամանակ Ղազախստանի ներկայացուցիչները չեն թաքցնում իրենց դիրքորոշումը՝ այն բացատրելով Ադրբեջանի հետ ունեցած դաշնակցային հարաբերություններով:
Ռուսաստանն էլ, ըստ էության, այնքան էլ շահագրգռված չէ Հայաստանի պատճառով հարաբերություններ փչացնել Ղազախստանի հետ: Նույնիսկ հայ պաշտոնյաներն են ընդունում, որ Հայաստանի հետ կապված իր ծրագիրը Ռուսաստանը կատարել է. փչացրել է Հայաստանի և ԵՄ-ի հարաբերությունները՝ անհնարին դարձնելով Հայաստանի կողմից ԵՄ-ի հետ Ասոցացման համաձայնագրի ստորագրումը: Իսկ Հայաստանը կդառնա՞ Մաքսային միության անդամ, թե՞ չի դառնա, դա այլևս Ռուսաստանի համար չորրորդական հարց է:
