Եվրախորհրդարանը հաստատել է ԵՄ-ի ու Ադրբեջանի միջև վիզային ռեժիմի դյուրացման համաձայնագիրը
Ադրբեջանական APA լրատվական գործակալության փոխանցմամբ՝ Եվրախորհրդարանը հաստատել է ԵՄ-ի ու Ադրբեջանի միջև վիզային ռեժիմի դյուրացման ու հետընդունման մասին համաձայնագիրը: Այս մասին հայտնել է Եվրախորհրդարանի մամուլի ծառայությունը:
Վերջինիս հաղորդմամբ՝ այդ որոշումն ընդունվել է այսօր՝ Ստրասբուրգում տեղի ունեցած Եվրախորհրդարանի լիագումար նիստում: Փաստաթղթում ընդգծվում է, որ ընդունված որոշումը կնպաստի ԵՄ-ի ու Ադրբեջանի միջև համագործակցության զարգացմանը:
Ադրբեջանը ԵՄ-ի հետ վիզային ռեժիմի դյուրացման մասին համաձայնագիրը ստորագրել է 2013 թվականի նոյեմբերին, իսկ հետընդունման մասին համաձայնագիրը՝ այս տարվա փետրվարի 28-ին: Երկու համաձայնագրերն էլ ուժի մեջ են մտնելու այս տարվա երկրորդ կեսին՝ Ադրբեջանի խորհրդարանի կողմից հաստատվելուց հետո:
