Տարոն Մարգարյանն իր մարտական ուղու մասին. «ՀԺ»
«ՀԺ»-ն գրում է. Անցած շաբաթ 5-րդ բրիգադի սպառազինության գծով հրամանատարի օգնական Ֆրունզե Ավագյանը՝ «Պալկովնիկը», հայտարարել էր, թե 1990–1991 թվականներից Տարոն Մարգարյանը մասնակցություն է ունեցել Ղարաբաղյան պատերազմին և զենք է մատակարարել առաջին գիծ. «Տարոն Մարգարյանը շատ երիտասարդ եղած ժամանակ աջակցել է ու օգնություն է ցույց տվել։ Այն ժամանակ տարիքը չէր ներում, որ հրացանն առներ ու կանգներ առաջին գծում, բայց մարդկանց զենք ու զինամթերք էր հասցնում», Aravot.am-ին ասել էր նա։
Այդ ժամանակ, սակայն, Տարոն Մարգարյանը 12-13 տարեկան է եղել։ Երեկ Երևանի քաղաքապետ Տարոն Մարգարյանից հետաքրքրվեցինք հերոսական անցյալի մանրամասների մասին.
– Պարոն Մարգարյան, դժվար չէ՞ր արդյոք 12-13 տարեկանում զենք մատակարարել Ղարաբաղյան պատերազմի առաջին գիծ։
– Դա անհեթեթություն է։ Ճիշտ է, ես էլ եմ ԵԿՄ անդամ, բայց Աստված չանի, եթե վաղը մեր սահմաններում խնդիր լինի, պատրաստ եմ մասնակցել։
– Այսինքն, մանկահասակ տարիքում զենքեր չե՞ք տարել Ղարաբաղ։
– Դա անհեթեթություն է, նման բան չի եղել։ Ո՞վ է ասել, ես չգիտեմ։ Ես հերքում եմ այդ սուտ լուրը։ Իսկ ինչ մնում է ԵԿՄ անդամ լինելուն, բազմիցս հայտարարվել է, որ ԵԿՄ անդամագրվելու համար պարտադիր չէ պատերազմի մասնակից լինել։
Մանրամասները՝ «Հայկական Ժամանակի» այսօրվա համարում։
