Կիվիրյանը դատարանից արդարություն չի ակնկալում
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր ավարտվեց Արգիշտի Կիվիրյանի բողոքի քննությունը: Փետրվարի 3-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատարավոր Գագիկ Պողոսյանը կհրապարակի իր որոշումը՝ արդյոք պե՞տք է հարուցվի քրեական գործ, թե՞ ոչ: Ինչպես հայտնի է, Ա. Կիվիրյանը դատարան էր բողոքարկել Հատուկ քննչական ծառայության որոշումը իր նկատմամբ բռնություն կիրառելու դեպքի առիթով քրեական գործ չհարուցելու մասին: Բացի դա՝ Ա. Կիվիրյանը պնդում է, որ ոստիկանության բաժանմունք բերման ենթարկվելուց հետո ինքն այնտեղ մնացել է սահմանվածից երկար ժամանակ: Այսօր դատական նիստի ավարտից հետո Ա. Կիվիրյանն ասաց, որ դատարանից արդարություն չի ակնկալում: «Վստահ եմ, որ դատարանը կիրականացնի այն որոշումը, ինչ իրեն կհանձնարարեն»,- ասաց Ա. Կիվիրյանը: Միևնույն ժամանակ նա նշեց, որ հնարավոր է՝ դատարանը որոշում կայացնի այն մասին, որ պետք է քրեական գործ հարուցվի. «Իրենք կարող է գնան գործի հարուցմանը, որպեսզի խուսափեն այլ հետևանքներից, որովհետև այսօր երևաց, թե ինչ ծանրակշիռ ապացույցներ կան գործում, որոնց առկայության պարագայում իրենք պարտավոր են գործ հարուցել»։
