ԱՄՆ-ում ստեղծել են ընթերցողին ներկայության էֆեկտ հաղորդող գիրք (լուսանկարներ)
Lenta.ru-ի փոխանցմամբ՝ Մասաչուսեթսի տեխնոլոգիական ինստիտուտի ուսանողները ստեղծել են ներկայության էֆեկտով գիրք: Այն իրենից ներկայացնում է երկու էլեկտրոնային սարքից բաղկացած հավաքածու, որն ունակ է արձագանքել ընթերցողի զգացմունքներին և մասնակիորեն վերարտադրել այն իրավիճակը, որում հայտնվում է վեպի կամ պատմվածքի գլխավոր հերոսը:
Գիրքն անվանվել է Sensory Fiction, այն նաև ունակ է հետևել այն հատվածին, որի վրա ուղղված են ընթերցողի աչքերը: Գրքում տեղակայված 150 լուսադիոդներն ունակ են փոխել իրենց գույնը՝ կախված ընթերցվող հատվածի բովանդակությունից: Նոր սարքը նաև տվյալներ է փոխանակում հատուկ բաճկոնի հետ, որն ընթերցողը պետք է կրի իր վրա:
Դրանում առկա են վիբրացիայի տարրեր ու սեղմման համակարգ: Ընթերցանության ժամանակ բաճկոնը՝ կախված ծրագրից, փոխում է տարրերի ջերմաստիճանը՝ տաքացնելով կամ սառեցնելով դրանք՝ ստեղծելով գլխավոր հերոսի սրտի թրթիռի պատրանք, իսկ սեղմման համակարգն իր հերթին ստեղծում է այն պայմանները, որոնցում հայտնվել է նա:
Մթնոլորտի վերստեղծման համար Sensory Fiction գիրքը կարող է վերարտադրել տարբեր ձայներ: Նշվում է, որ գիրքն ունի կատարելագործման կարիք:
