Վրաստանն ու Իսրայելը կստորագրեն ազատ առևտրի մասին համաձայնագիր
Грузия Online-ի փոխանցմամբ՝ Վրաստանի վարչապետ Իրակլի Գարիբաշվիլին իր առաջին պաշտոնական այցով այսօր մեկնում է Իսրայել, ուր պլանավորված է վրաց-իսրայելական միջկառավարական տնտեսական հանձնաժողովի նիստը: Այս մասին հայտարարել է վարչապետի մամուլի ծառայությունը:
Երկօրյա իսրայելական այցի ընթացքում Գարիբաշվիլին հանդիպումներ է ունենալու այդ երկրի նախագահի, վարչապետի, խորհրդարանի նախագահի և պաշտոնատար այլ անձանց հետ: Այցի շրջանակներում ստորագրվելու է Վրաստանի ու Իսրայելի միջև ազատ առևտրի մասին պայմանագիր:
2013 թվականին Վրաստանի ու Իսրայելի միջև ապրանքաշրջանառությունը, 2012 թվականի հետ համեմատ, կրճատվել է գրեթե երկու անգամ՝ մինչև 34.1 միլիոն դոլարի (Վրաստանի արտաքին առևտրային շրջանառության 0.3 տոկոսը): Նախորդ տարվա 9 ամսում Վրաստանում իսրայելական ուղիղ ներդրումները կազմել են 6.9 միլիոն դոլար (ողջ ներդրումների 1 տոկոսը):
