Հայտնի է դարձել Եգիպտոսի նախագահական ընտրությունների անցկացման ժամկետը
Բրիտանական Reuters լրատվական գործակալության փոխանցմամբ՝ Եգիպտոսի նախագահական ընտրությունները տեղի են ունենալու 2014 թվականի ապրիլի կեսից ոչ ուշ: Այս մասին հայտարարել է Եգիպտոսի ժամանակավոր նախագահ Ադլի Մանսուրը:
Ավելի վաղ ենթադրվում էր, որ Եգիպտոսում նախ տեղի են ունենալու խորհրդարանական ընտրություններ և դրանից հետո միայն անցկացվելու են նախագահական ընտրություններ: Մանսուրը չի նշել նախագահական ընտրությունների ստույգ ժամկետը:
Սակայն հունվարի կեսին ընդունված երկրի նոր Սահմանադրությունում նշված է, որ քվեարկությունը պետք է տեղի ունենա պետության հիմնական օրենքի ընդունումից 90 օրից ոչ ուշ:
Գործակալության տվյալներով՝ մոտ ժամանակներս նախագահ առաջադրվելու մտադրության մասին կհայտնի գեներալ Աբդել Ֆաթթահ ալ-Սիսին, ով ղեկավարել է նախագահ Մոհամմեդ Մուրսիի գահընկեցությանը հանգեցրած ռազմական հեղաշրջումը:
Եգիպտոսում նոր Սահմանադրության շուրջ հանրաքվեն անցկացվել է հունվարի 14-15-ին: Դրան մասնակցել է ընտրողների 55 տոկոսը, որոնց ավելի քան 95 տոկոսը կողմ է արտահայտվել նոր Սահմանադրության ընդունմանը:
