Մեր գործողությունները «Ալիշանի» նկատմամբ ընկերության լիազորությունների շրջանակներում են և իրավաչափ. «ՀայՌուսգազարդ»
Անցած տարի դեկտեմբերին առաջին անգամ խնդիրը հրապարակայնացնելուց հետո «Ալիշան» պահածոների գործարանի ներկայացուցիչները հրավիրվել էին «ՀայՌուսգազարդ» ընկերություն, նրանց բողոքները լսվել և պարզաբանումներ են տրվել: Այս մասին 168.am-ի հետ զրույցում հայտարարեց «ՀայՌուսգազարդի» լրատվական բաժնի ղեկավար Շուշան Սարդարյանը:
«Առաջին քննարկումը եղել է, իսկ տեխնիկական հարցերը խիստ մասնագիտական են: Մենք կողմնակից ենք մասնագիտական քննարկման, և ոչ թե հրապարակային բանավեճի, և մենք պատրաստ էինք նորից նստել ու քննարկել, այսինքն՝ իրենց արծարծած բոլոր թեմաները զուտ մասնագիտական քննարկման ու պարզաբանման կարիք ունեն: Ինչ վերաբերում է «ՀայՌուսգազարդ»-«Ալիշան» ընկերությունների հարաբերություններին, ապա մեր ընկերության գործողությունները «Ալիշանի» նկատմամբ «ՀայՌուսգազարդի» լիազորությունների շրջանակներում և իրավաչափ են»,-ասաց Շ.Սարդարյանը:
Հիշեցնենք, որ սպառած գազի դիմաց «Ալիշան» ընկերության դեբիտորական պարտքը առ 01.01.2014 թ-ի դրությամբ կազմում է 1,906,608 դրամ, սակայն գործարանի ղեկավարությունը գտնում է, որ հաշվարկը սխալ է կատարվել և 200 հազար դրամ ավելի է:
