Հայաստանն այլևս չի մասնակցի Դավոսի Համաշխարհային տնտեսական ֆորումին
Հայաստանի իշխանությունը, թերևս, այլևս չի մասնակցի Դավոսում Համաշխարհային տնտեսական ֆորումի հավաքներին: Համենայն դեպս՝ այս կազմով: Այս տարի, հերթական անգամ, ՀՀ կառավարությունը որոշել է ձեռնպահ մնալ և չմեկնել հունվարիի 22-25-ին կայանալիք դավոսյան համաժողովի 44-րդ նիստին:
ՀՀ վարչապետի մամլո քարտուղար Հարություն Բերբերյանը 168.am-ին հայտնեց, որ ՀՀ կառավարությունը գերադասում է մասնակցել ոչ թե բուն դավոսյան, այլ ամռանը տեղի ունեցող համաշխարհային տնտեսական համաժողովներին, օրինակ՝ անցած տարի ՀՀ-ն մասնակցել է Չինաստանի Դալյան քաղաքում կայացած «Ամառային Դավոս 2013»-ին, նախորդ տարին մեկնել էին Վիլնյուս:
Հարցին՝ ինչո՞վ է ամառային հավաքը գերադասելի ձմեռայինից, Հ.Բերբերյանը պատասխանեց. «Այս պահին ավելի նպատակահարմար է ամառային համաժողովներին մասնակցելը»:
Նկատենք, որ ամառային հավաքները սովորաբար նույնպես մարդաշատ են, բայց դրանց մասնակիցները, ի տարբերության դավոսյան համաժողովների, ոչ թե պետության ղեկավարներ են, այլ այստեղ երկրներն ավելի ցածր կարգավիճակով են ներկայացված՝ նախարարների, առավելագույնը՝ վարչապետների, նաև եթե Դավոսում տեղի է ունենում «համաժողով», ապա ամռանը՝ «դավոսյան խորհրդակցություն»:
