Ուկրաինայի վարչապետը դիտորդի կարգավիճակով Մոսկվայում կմասնակցի Մաքսային միության համաժողովին
Ռուսական РИА Новости լրատվական գործակալության փոխանցմամբ՝ Ուկրաինայի վարչապետ Նիկոլայ Ազարովը պլանավորում է վաղը Մոսկվայում մասնակցել Եվրասիական տնտեսական բարձրագույն խորհրդի նիստին, որն անցկացնելու են Ռուսաստանի, Բելառուսի ու Ղազախստանի (Մաքսային միություն) ղեկավարները:
Այս մասին այսօրվա ճեպազրույցի ժամանակ հայտարարել է Ռուսաստանի նախագահի օգնական Յուրի Ուշակովը. «Մասնակցության հրավեր են ստացել Հայաստանի ու Ղրղզստանի նախագահները, այսինքն այն երկրների նախագահները, որոնք հայտ են ներկայացրել Մաքսային միության ու Միացյալ տնտեսական տիրույթ մտնելու համար: Ներկա է գտնվելու նաև Ուկրաինայի վարչապետ Նիկոլայ Ազարովը՝ դիտորդի կարգավիճակով»:
