Կրեմլը հերքել է Մաքսային միությանը միանալու հարցում Ուկրաինայի հետ պայմանավորվելը
Ռուսական РИА Новости լրատվական գործակալության փոխանցմամբ` Ռուսաստանի նախագահի մամլո քարտուղար Դմիտրի Պեսկովն այսօր հայտարարել է, որ Ռուսաստանի ու Ուկրաինայի նախագահներ Վլադիմիր Պուտինն ու Վիկտոր Յանուկովիչը Սոչիում չեն քննարկել Մաքսային միությանն Ուկրաինայի անդամակցելու հնարավորությունը:
Պեսկովի խոսքերով` Ռուսաստանի ու Ուկրաինայի ղեկավարները դիտարկել են ֆինանսա-վարկային ոլորտում երկկողմ համագործակցության ընթացիկ վիճակն ու հեռանկարները:
Ավելի վաղ բրիտանացի հայտնի լրագրող, The Economist պարբերականի ավագ խմբագիր Էդվարդ Լուկասը Twitter-ում գրել էր, որ երեկ Սոչիում Ռուսաստանի ու Ուկրաինայի նախագահների միջև տեղի ունեցած հանդիպման ժամանակ պայմանավորվածություն է ձեռք բերվել Մաքսային միությանն Ուկրաինայի անդամակցության մասին:
