Հայաստանը պատրա՞ստ է ընդունել Եվրոպայից արտաքսվող հայաստանցիներին
Հոկտեմբերի 10-ին ԵԽ-ն վավերացրել է Հայաստանի հետ վիզային ռեժիմի դյուրացման և ռեադմիսիայի (հետընդունման) համաձայնագրերը: Այս մասին տեղեկացնում է «Փաստինֆոն»:
Այս վերջինի շրջանակներում Հայաստանը Եվրոպայի հետ, փաստորեն, այսուհետ համագործակցելու է եվրոպական երկրներում անօրինական կարգավիճակով բնակվող իր քաղաքացիների վերադարձի հարցում: Մի կողմից, փաստորեն, դյուրացվում է ՀՀ քաղաքացիների մուտքը Եվրոպա, մյուս կողմից պարտավորվում է այնտեղ ապօրինի բնակվողներ ՀՀ քաղաքացիներին վերադարձնել հայրենիք:
Որքա՞ն հայաստանցիներ ստիպված կլինեն վերադառնալ ՀՀ և ի՞նչ է արվում հայրենիքում նրանց վերադարձն ու ապրուստն ապահովելու համար: Այս հարցերի շուրջ հասարակության շրջանում առկա մտահոգություններն այսօր խորհրդարանական լսումների ընթացքում կիսեցին նաև դրանց մասնակից ընդդիմադիր պատգամավորները: ԲՀԿ անդամ Նաիրա Զոհրաբյանը հայտարարեց, որ արդեն իսկ բազմաթիվ նամակներ է ստանում, որոնց հեղինակ, արտերկրում բնակվող մեր հայրենակիցները մտահոգություն են հայտնում, թե «իրենց տպավորությամբ իրենց բոլորին նստեցնելու են ինքնաթիռ և արտաքսելու են Հայաստան»,-ասաց Նաիրա Զոհրաբյանը` հավելելով նաև այս հարցի շուրջ սեփական մտահոգությունները.
«Երբ որ նրանք վերադառնան Հայաստան, մենք կարողանալու ե՞նք այդ մարդկանց համար ապահովել արժանապատիվ վերաինտգրում»:
Միաժամանակ պատգամավորը նաև պատասխանեց սեփական հարցադրմանը` նշելով, որ ինքն անձամբ այս պահին չի տեսնում նման ռեսուրսներ և գործիքներ: ՀՀԿ անդամ Արտակ Զաքարյանն էլ կարծիք հայտնեց, թե չկան արտերկրում ժամանակավոր բնակվող ՀՀ քաղաքացիներ, ովքեր չեն ցանկանում վերադառնալ հայրենիք: Այդուհանդերձ, պատգամավորը չհերքեց, որ Հայաստանն այսօր կարիք ունի` տնտեսական ցուցանիշերը բարելավելու, արտերկրից վերադարձող իր քաղաքացիներին պատշաճ կարգով ընդունելու և ապահովելու համար: Բայց և միաժամանակ շեշտեց, որ կառավարությունն այս ուղղությամբ ծրագրեր ունի և աշխատում է:
