Հիլարի Քլինթոնի «ոսկեբեր գետակը»
ԱՄՆ նախկին պետքարտուղար Հիլարի Քլինթոնը «ոսկեբեր գետակ» է գտել. նա իր յուրաքանչյուր ելույթի համար աստղաբաշխական հոնորար է ստանում: Ըստ «National Review Online» պարբերականի` նախկին պետքարտուղարն օրերս մասնակցել է աշխարհի խոշորագույն «Goldman Sachs» առեւտրային բանկի միջոցառումներին եւ հանդես է եկել երկու ելույթով: Դրանցից յուրաքանչյուրի համար նա ստացել է մոտ 200 հազար դոլար հոնորար: Ստացվում է, որ երկու օրվա ընթացքում նա վաստակել է 400 հազար դոլար:
«Ընդամենը մի քանի ամիս առաջ լքելով պետքարտուղարի պաշտոնը, Հիլարի Քլինթոնն արդեն ձեռնամուխ է եղել հանրային ելույթների եկամտաբեր գործին` այդպիսով միանալով ընտանեկան բիզնեսին, որը Քլինթոններին ավելի քան 100 մլն դոլարի եկամուտ է բերել 2001թ-ին նրա ամուսնու` Սպիտակ տնից հեռանալուց հետո»,-գրում է The New York Times-ը:
