Հայաստանի ու Ադրբեջանի նախագահները կարող են հանդիպել նոյեմբերի վերջին. աղբյուր
Ադրբեջանական APA լրատվական գործակալության փոխանցմամբ՝ Հայաստանի ու Ադրբեջանի նախագահների հանդիպումը կարող է տեղի ունենալ նոյեմբերի վերջին: Այս մասին գործակալությանը հայտնել է դիվանագիտական աղբյուրը:
Վերջինիս հաղորդմամբ՝ ԵԱՀԿ Մինսկի խմբի համանախագահները հերթական անգամ տարածաշրջան կժամանեն նոյեմբերի առաջին շաբաթվա ընթացքում: Այցը կսկսվի Բաքվից, ուր համանախագահները հանդիպումներ կունենան Ադրբեջանի նախագահի ու արտգործնախարարի հետ:
Դրանից հետո նրանք կմեկնեն Երևան: Այցի նպատակը Ղարաբաղյան հակամարտության կարգավորման ջանքերի շարունակումն է և Հայաստանի ու Ադրբեջանի նախագահների միջև հերթական հանդիպման կազմակերպումը:
Միջնորդները մտադիր են նրանց առաջարկել հանդիպել միմյանց հետ: Ամեն ինչ կախված կլինի կողմերից: Եթե նրանք համաձայնություն տան, ապա հանդիպումը կարող է տեղի ունենալ նոյեմբերի վերջին:
