Թուրքիայի խորհրդարանը մեկ տարով երկարաձգել է Սիրիայի դեմ անդրսահմանային գործողություններ ձեռնարկելու կառավարության մանդատը
Թուրքական Anadolu լրատվական գործակալության փոխանցմամբ՝ Թուրքիայի խորհրդարանը երեկ մեկ տարով երկարաձգել է նախորդ տարի կառավարությանը տրամադրած մանդատը, որը նրան հնարավորություն է ընձեռում անհրաժեշտության դեպքում Սիրիայի դեմ ձեռնարկել անդրսահմանային գործողություններ և զինվորներ ուղարկել այդ երկիր:
Թուրքիայի կառավարությունն այդ մանդատը ստացել է 2012 թվականի հոկտեմբերի 4-ին՝ կապված Սիրիային սահմանակից թուրքական շրջանների բնակիչներին սիրիական հրետակոծություններից ու գնդակոծություններից պաշտպանելու հետ: Ընդդիմադիր «Ժողովրդա-հանրապետական» կուսակցությունը դեմ է քվեարկել դրան:
Հիշեցնենք, որ Թուրքիայի կառավարությունը Սիրիայի վերաբերյալ օրինագիծը հաստատման համար խորհրդարանին ներկայացրել էր հոկտեմբերի 1-ին, և դրանում մանրակրկիտ շարադրել էր անդրսահմանային գործողություններ իրականացնելու ժամկետը մեկ տարով երկարաձգելու հիմնավորումները:
