Արմեն Մովսիսյան․ Գազի գնի սուբսիդավորման շուրջ բանակցություններն ավարտված են
Գազի գնի սուբսիդավորման շուրջ բանակցությունները Ռուսաստանի հետ ավարտված են և Հայաստանը «հաստատ գումար կստանա»՝ կապույտ վառելիքի նոր գինը սուբսիդավորելու համար, այսօր կառավարության նիստից հետո, ըստ «Ազատություն» ռադիոկայանի՝ պատասխանելով լրագրողների հարցերին, նման հայտարարություն է արել Էներգետիկայի և բնական պաշարների նախարար Արմեն Մովիսիսյանը:
Մովիսիսյանը, սակայն, հրաժարվել է մանրամասներ հրապարակել՝ ի՞նչ գումարի մասին է խոսքը, այդ գումարը Հայաստանը որպես վա՞րկ է ստանալու, թե՞ այդ գումարի դիմաց ռուսական կողմին է զիջվելու որևէ ունեցվածք: Փոխարենը նախարարը խոստացել է առաջիկա օրերին հրապարակել բանակցությունների ամբողջական արդյունքները:
Ինչպես հայտնի է, հուլիսի 7-ից ուժի մեջ մտան գազի ու էլետրանէներգիայի նոր սակագները, և մասնավորապես, բնակիչները պետք է մեկ խորանարդ մետր գազի համար վճարեն 156 դրամ՝ նախկին 132-ի փոխարեն:
Մինչդեռ, սուբսիդավորման հարցում հստակություն չէր մտնում:
Կառավարության ներկայացուցիչները, այդ թվում՝ վարչապետը, էներգետիկայի ու բնական պաշարների նախարարը, բազմիցս հայտարարել են, թե կառավարությունը միջոցներ է հատկացնելու գազի նոր գինը մոտ 30 տոկոսով սուբսիդավորելու համար:
Կարդացեք այստեղ.
