Այսօր Վաշինգտոնում վերսկսվում են պաղեստինա-իսրայելական բանակցությունները
BBC-ի փոխանցմամբ՝ ԱՄՆ պետդեպարտամենտը հայտարարել է, որ այսօր Վաշինգտոնում վերսկսվում են պաղեստինա-իսրայելական բանակցությունները, որոնք փակուղի էին մտել 2010 թվականին:
Վերջին շրջանում ԱՄՆ պետքարտուղար Ջոն Քերին զգալի ջանքեր է գործադրել տվյալ բանակցությունների վերսկսման ուղղությամբ: Դրանց արդյունքում Իսրայելը հայտարարել է, որ բանտից ազատ է արձակել ավելի քան 100 պաղեստինցի բանտարկյալի:
Իսրայելա-պաղեստինյան բանակցություններն անցկացվելու են փուլերով և կտևեն մի քանի ամիս:
Հիշեցնենք, որ սրանից առաջ թե՛ Իսրայելի վարչապետ Բենիամին Նեթանյահուն, թե՛ Պաղեստինի ինքնավարության առաջնորդ Մահմուդ Աբբասը խոստացել են, որ եթե բանակցությունների ժամանակ կողմերի միջև ձեռք բերվեն արդյունքներ, ապա դրանք կդրվեն հանրաքվեի:
