Դեդ Հասանի երբեմնի հակառակորդը դատապարտվեց 8 տարվա ազատազրկման
Այսօր Նիժնի Տագիլի Տագիլստրոևսկի շրջանային դատարանը 8 տարվա ընդհանուր ռեժիմի ազատազրկման է դատապարտել Կարո մականունով, 54-ամյա քրեական հեղինակություն Քոռ-Օղլի Մամեդովին: Այս մասին գրում է «Փաստինֆոն»՝ հղում անելով Սվերդլովսկի մարզի դատախազության պաշտոնական կայքին:
Մամեդովը դատապարտվել է ռեկետի և անօրինական ձևով «Տագիլօպտորգ» ԲԲԸ-ի հսկիչ արժեթղթերին և հիմնադիր կապիտալի 56 տոկոսին տիրանալու փորձ կատարելու համար:
Աճուրդի ժամանակ, այդ գործարքին չմասնակցելու Մամեդովի պահանջներին հակառակ, տեղացի մի գործարար ձեռք է բերում ձեռնարկության արժեթղթերի 37 տոկոսը: Օրենքով գողը ոչ մի կերպ չի կարողանում ներել տեղացի գործարարի այդ հանդգնությունը և ամիսներ շարունակ հետապնդում է նրան, ենթարկում ծեծի, սպառնում, որ կոչնչացնի նրա ունեցվածքը:
Բացի այդ` նա պահանջում է իրեն տալ ձեռք բերած արժեթղթերի 9 տոկոսը, որը գումարային արտահայտությամբ կազմում էր 4 մլն ռուբլի: Դա հնարավորություն կտար նրան իր վերահսկողությունը տարածել ձեռնարկության վրա: Բացի այդ իրեն պատճառած անհանգստությունների համար Մամեդովը գործարարից պահանջում է, որ իրեն ամեն ամիս վճարի 1 մլն ռուբլի:
Ի վերջո, գործարարի բողոքի հիմքով իր դեմ հարուցված քրեական գործի քննության արդյունքում «օրենքով գողը» կանգնեց դատական պատասխանատվության առջև:ՌԴ քրեական օրենսգրքի «շորթում» հոդվածի հատկանիշներով նա դատապարտվեց 8 տարվա ազատազրկման:
Նրա նկատմամբ արձակված դատավճիռը դեռ օրինական ուժի մեջ չի մտել` հաղորդում է «newsru.com»-ը:
Նշենք, որ Կարոյի անունը հիշատակվում է՝ կապված քրեական հեղինակությունների Եկատերինբուրգում 2004թ. սեպտեմբերի 15-ին կայացած հավաքի հետ: Այդ հավաքը քաղաքական մեծ աղմուկ առաջացրեց, քանի որ «սխոդկային» մասնակցում էր Եկատերինբուրգի քաղաքային դումայի անդամ ընտրված, «Ուրալմաշ» խմբավորման ղեկավար Ալեքսանդր Խաբարովը:
Այդ ժամանակ քրեական հեղինակությունները փորձում էին միացյալ ուժերով հակադրվել Մոսկվայից սկսված ազդեցության վերաբաշխման գործընթացին: «Գողական ուղղահայաց իշխանության» օգտին էր հանդես գալիս ընթացիկ տարվա սկզբներին սպանված Ասլան Ուսոյանը (Դեդ Հասանը), իսկ Մոսկվայից անկախ, առանձին գործելու կողմնակիցներից մեկը հենց Կարոն էր: Այդ հակամարտությունն ավարտվեց այն բանով, որ Դեդ Հասանը նրան զրկեց «գողականի թագից»: Թեև պետք է նշել, որ այդպիսի որոշման հետ ոչ բոլոր հեղինակություններն էին համաձայն:
Կայքը նաև ավելացնում է, որ «Մոսկվային հակադրվելու պատճառով» տխուր վախճան ունեցավ նաև Ալեքսանդր Խաբարովը: Նա ձերբակալվեց, իսկ հետո մենախցում հայտնաբերվեց կախված:
