Պարունակ Զելվեյանը՝ ՀՀ առողջապահության ազգային ինստիտուտի տնօրեն
ՀՀ առողջապահության ազգային ինստիտուտի տնօրեն է նշանակվել տնօրենի ժամանակավոր պաշտոնակատար Պարունակ Զելվեյանը: Այս մասին 168.am-ի հետ զրույցում ասաց ՀՀ առողջապահության նախարարության հասարակայնության հետ կապերի բաժնի պետ Լիլիթ Բաբախանյանը:
Նշենք, որ «Ակադեմիկոս Ս.Խ. Ավդալբեկյանի անվան առողջապահության ազգային ինստիտուտ» ՓԲԸ-ի տնօրենի մրցույթը տեղի է ունեցել հունիսի 28-ին: Տնօրենի թափուր պաշտոնը զբաղեցնելու համար հայտ ներկայացրել էր միայն Պարունակ Զելվեյանը, ով մինչ այժմ ժամանակավորապես կատարում էր տնօրենի պարտականությունները: Պարունակ Զելվեյանը Երևանի գլխավոր սրտաբանն է, Հայկական բժշկական ասոցիացիայի նախագահը:
Հավելենք, որ ԱԱԻ նախկին տնօրեն Մկրտիչ Ավագյանը պաշտոնավարել էր 1,5 տարի: Նախորդ տարվա հուլիսին նա հրաժարականի դիմում էր ներկայացրել: Նրա հրաժարականից հետո առողջապահության նախարարությունը երկար ժամանակ տնօրենի թափուր պտոնը զբաղեցնելու համար մրցույթ չէր հայտարարում: Մրցույթ հայտարարվեց միայն այս տարվա ապրիլի 4-ին:
