Ալիկ Սարգսյան. Իմ օրոք Ներսիկը բիզնեսով չէր զբաղվում. մամուլ
«Խաչիկ Դաշտենցի անվան թիվ 114 դպրոցում տեղակայված 10/20 տեղամասում են քվեարկում մի շարք բարձրաստիճան անձինք: Նշված և հարակից տեղամասերին տիրություն էր անում ՀՀԿ վստահված անձ Դավիթ Սիմոնյանը՝ «Կյաժ» մականունով: Նա առանց վկայականի «կազմակերպում» էր ընտրական գործընթացը, ուղղորդում մարդկանց տեղամաս, ապա, հետաքրքրվելով վերջնական արդյունքով, ուսին թպթպացնելով, ճանապարհ դնում: Ընթացքում էլ բակում հավաքված խուժանին հանձնարարություններ էր տալիս և ուղարկում ի կատար ածելու»:
Հետևելով այդ գործընթացին, նկատեցինք, որ ՀՀ նախկին ոստիկանապետ Ալիկ Սարգսյանն է եկել քվեարկության: Եկել եմ պարտքս կատարեմ՝ ասաց»,- գրում է «Հրապարակ» օրաթերթը և ներկայացնում Ալիկ Սարգսյանի հետ հարցազրույցը
– Պարոն Սարգսյան, ո՞ւմ եք ընտրել:
– Տարոն Մարգարյանին, երիտասարդ տղա ա, նորմալ աշխատում ա: Մյուսների մեջ էլ առանձնապես պերսպեկտիվա չեմ տեսնում: Որ մյուսները գան, ի՞նչ նոր բան պիտի անեն, այ, դա չեմ հասկանում:
– Դե հնարավորություն տվեք, ընտրեք մյուսներից մեկին ու կտեսնեք ինչ-որ բան կանեն: Առանց տեսնելու ասում եք, թե չեն կարող նոր բան անել:
– Մենք Տարոն Մարգարյանին ենք հնարավորություն տալիս, թող աշխատի, ջահել, նորմալ տղա ա: Նորմալ դեմքով, դիրքով, նորմալ ընտանիքից, գենը լավն ա, օղորմածիկ հորը շատ լավ ճանաչում էի: Նորմալ կաշխատի:
– Պարոն Սարգսյան, իսկ Ձեզ չի՞ հետաքրքրում, թե որտեղից Տարոն Մարգարյանին այդքան ունեցվածք: Մի քանի բնակարան, առանձնատներ, հազարավոր դոլարներ հաշվեհամարին, բիզեսներ:
– Իսկ Դուք կարո՞ղ եք ասել, թե ինչի համար են այդ չարաշահումները հարմար տեղում, հարմար պահին երևում մամուլում: Ինչի՞ համար տարիներ շարունակ չեն խոսում և հանկարծ մի օր, երբ պետք է մարդուն վարկաբեկելու փորձ արվի, գրում են՝ նա ունի էս, ունի էն: Իմ կարծիքով, սա նույնիսկ բարոյական չէ: Մարդու մասին բան ունեք ասելու՝ ասեիք, ինչո՞ւ հենց հիմա:
– Ամեն դեպքում, Դուք ընդունո՞ւմ եք, որ դրանք չարաշահումներ են:
– Իսկ ոչի՞նչ, որ ինքն Անդրանիկ Մարգարյանի տղան է: Հայրը վարչապետ է եղել երկար տարիներ: Ինչի՞ եք ուզում ամեն ինչ բարդեք այդ երիտասարդ մարդու գլխին, ինչի՞ համար: Ես դա անարդար եմ համարում:
– Տարոն Մարգարյանի հսկայական ունեցվածքի ծագման աղբյուրների ճշգրտման փորձերն է՞լ եք անարդար համարում:
– Այո, ես դա անարդար եմ համարում: Եթե սլաքները շուռ տանք, կասեն՝ հորից ա եկել և այլն: Բայց հիշեք Անդրանիկ Մարգարյանի հուղարկավորությունը: Ես դա միշտ հիշում ու չեմ մոռանում: Դա մի կլասիկ օրինակ է, որ ղեկավարը կարող է ժողովրդի կողմից այդքան սիրվի: Դրա առաջ հարկավոր է խոնարհվել երևույթի առաջ, որ ղեկավարը կարող է այդքան սիրվել, հետմահու այդ հարգանքը վայելել: Շատ ղեկավարների թաղման զզվանքով են գնում, զզվելով, բայց Անդրանիկ Մարգարյանի թաղմանը ժողովուրդն իր վերաբերմունքը ցույց տվեց: Ժողովուրդը սիրում էր նրան: Սա պետք է հաշվի առնել: Կարծում եմ՝ նույնն էլ իր տղան կլինի:
– Պարոն Սարգսյան, Գյումրիի դեպքերը…
– Ի՞նչ ա եղել, արտառոց ոչ մի բան չեմ տեսնում: Սովորական մի հատ խուլիգանական դրսևորում էր: Անունն ուզում եք «կլան» դրեք, ուզում եք «մաֆիոզ խմբավորում» դրեք: Ինձ համար միևնույն է: Սովորական հանցավոր դրսևորում էր որի դեմ, իմ կարծիքով, օրգաններն արժանի պայքար են մղում, և ամեն ինչ նորմալ կլինի:
– Այդ կլանները Ձեր ղեկավարման տարիներին չկայի՞ն:
– Ես հիմա չեմ կարող ասել: Որ ասեմ չկային, նոր ծնվեցին սուտ կլինի: Էն ժամանակ էլ կային, պարզապես դրսևորում չի եղել, համապատասխան պայքարն էլ էն ձևով չի եղել: Բայց որ լիներ, մի կասկածեք՝ էս ձևով, շատ հնարավոր է ավելի թունդ կպայքարեինք:
– Իսկ ինչո՞ւ չէր լինում: Ձեզ հնարավորություն չէի՞ն տալիս:
– Գլուխ գովելու տարբերակ չլինի՝ ուղղակի չէր լինում: Իմ հետ չկապեմ դա, ուղղակի չէր լինում: Պահը չի եղել, առիթը չի եղել: Հիմա հանցագործությունը կատարվել է ու բացահայտվել: Իմ ժամանակ էլ կատարվեր՝ կբացահայտվեր: Սրա մեջ ոչ մի տարօրինակ բան չկա: Դրան շատ նորմալ է պետք վերաբերվել: Բայց էնպես էլ չի, որ իմ օրոք սրանք չեն եղել կամ էնպես էի աշխատում, որ սրանք վախենում էին:
– Պարոն Սարգսյան, մամուլում գրվեց, և արդեն իսկ քրեական գործ է հարուցվել բարձրաստիճան ոստիկանների կողմից ֆինանսա¬կան բուրգի վերաբերյալ:
– Դրա մասին ոչ մի տեղեկություն չունեմ առայժմ, միայն մամուլից եմ ծանոթացել ու մի քիչ էլ թերահավատ եմ էդ բուրգի նկատմամբ:
– Բայց արդեն քրեական գործ է հարուցվել:
– Շատ է եղել, որ քրեական գործ է հարուցվել, համապատասխան ընթացք է ստացել… անմեղության կանխավարկածը միշտ հարգում եմ և դժվարանում եմ հավատալ, որ ոստիկանները կգնային այդ քայլին: Չեմ կարծում, որ դա իրենց պետք էր կամ այդքան տարի թաքնվել են համազգեստի տակ: Չեմ էլ ուզում դրա մասին մտածել, վիրավորական է, քանի որ ես էլ եմ երկար տարիներ կրել այդ համազգեստը: Վիրավորական բան է: Եթե այդպիսի բան են արել, ես բան չունեմ ասելու: Ամոթ: Բայց ասում եմ. իմ կարծիքով՝ մի քիչ ուռճացված է ամեն ինչ:
– Պարոն Սարգսյան, Ներսիկ Նազարյանին պաշտոնանկ անելուց հետո ոստիկանությունը հաղորդագրություն տարածեց՝ հայտարարելով, թե իր համար անընդունելի է պաշտոնի և բիզնեսի համատեղումը: Ձեզ համար ընդունելի՞ էր այդ երևույթը՝ հաշվի առնելով, որ Նազարյանը պաշտոնավարել է նաև Ձեր ժամանակ:
– Չէ, իմ ժամանակ նա բիզնեսով չէր զբաղվում: Բիզնեսը հավատարմագրով հանձնել էր որդուն, որն օրենսդրությամբ արգելված չէ:
– Իսկ Նազարյանի պաշտոնանկությանն ինչպե՞ս եք վերաբերվում:
– Նորմալ, ինչի՞ մասին է խոսքը: Մարդիկ հո 100 տարի չե՞ն աշխատելու: Միշտ էլ ասել եմ՝ 3 տարուց ավելի մարդուն նույն պաշտոնին չեն թողնում: Մարդը 10 տարի չի կարող ղեկավարել մի նախարարություն կամ մի վարչություն: Դա նորմալ երևույթ չէ՝ իմ կարծիքով: Իսկ Ներսիկ Նազարյանը 10 տարի ղեկավարում էր: Հերիք ա, հիմա թող հանգստանա: Մի ուրիշ տեղ կնշանակեն՝ կղեկավարի, բայց ոչ Երևան քաղաքի վարչությունը, հերիք ա, 10 տարին շատ մեծ ժամանակահատված էր»:
