Սիրիայում քիմիական զենք կարող է կիրառած լինել ընդդիմությունը. ՄԱԿ-ի հատուկ հանձնաժողովի անդամ
Բրիտանական Reuters լրատվական գործակալության փոխանցմամբ՝ ՄԱԿ-ի՝ Սիրիայում մարդու իրավունքների խախտումները հետաքննող հատուկ հանձնաժողովի անդամ, Շվեյցարիայի նախկին գլխավոր դատախազ Կառլա դել Պոնտեն հայտարարել է, որ Սիրիայում քիմիական զենք կարող են կիրառած լինել զինված ընդդիմության անդամները և ոչ թե կառավարական զորքերը:
Նա հայտարարել է, որ իրենք այցելել են Սիրիայի հարևան երկրներ, և բժիշկներից, տուժածներից և դաշտային հոսպիտալների աշխատակիցներից ստացած տվյալների հիման վրա ենթադրում են, որ քիմիական զենքը՝ զարին գազը, օգտագործել է ընդդիմությունը, ապստամբները և ոչ թե կառավարությունը:
Նա հավելել է, որ ստացված տվյալներն անվիճելի ապացույցներ չեն, և հետաքննությունը դեռ հեռու է իր ավարտից: Դել Պոնտեն նաև չի մանրամասնել, թե երբ և որտեղ ընդդիմությունը կարող էր կիրառած լինել քիմիական զենք: Ավելի վաղ Սիրիայի կառավարությունն ապստամբներին մեղադրել էր մարտի 19-ին Հալեպի նահանգում քիմիական զենք կիրառելու մեջ:
