«Մատաղիսի» գործով ներկայացվել է վճռաբեկ բողոք
«Մատաղիսի» գործով զինդատախազությունը բողոք է ներկայացրել Վճռաբեկ դատարան՝ ընդդեմ գործով կայացված արդարացման դատավճռի և այն անփոփոխ թողնելու ՀՀ վերաքննիչ քրեական դատարանի որոշման: Այս մասին «Փաստինֆո»-ի թղթակցին հայտնեց Շիրակի մարզի ընդհանուր իրավասության դատարանի անցյալ տարվա դեկտեմբերի 18-ի դատավճռով արդարացվածներ Ռազմիկ Սարգսյանի, Մուսա Սերոբյանի ու Արայիկ Զալյանի պաշտպան Հայկ Ալումյանը:
Հետաքրքրական է, որ այս անգամ բողոք չեն ներկայացրել տուժող Ռոման Եղիազարյանի հարազատները՝ այսօր բողոք ներկայացնելու ժամկետի վերջին օրն էր: Հ.Ալումյանը չի բացառում, որ «գուցե իրենք էլ են համոզվել», որ իր պաշտպանյալները առնչություն չունեն հանցագործության հետ: Ըստ Հայկ Ալումյանի, մեղադրող կողմը ներկայացրել է նույնաբովանդակ Վճռաբեկ բողոք, ինչպիսին ներկայացվել էր Վերաքննիչ քրեական դատարան:
Հիշեցնենք, որ Վերաքննիչ քրեական դատարանում գործը քննվում էր մեղադրողների ու վերոհիշյալ տուժողի իրավահաջորդի բողոքների հիման վրա: Մասնավորապես, գործով դատավարական հսկողություն իրականացնող ՀՀ զինվորական դատախազությունը միջնորդում էր բեկանել արդարացման դատավճիռը և կայացնել մեղադրական դատավճիռ ՝ Ռազմիկ Սարգսյանին դատապարտելով 7 տարվա, իսկ Արայիկ Զալյանին ու Մուսա Սերոբյանին` 8-ական տարվա ազատազրկման:
Գործը երկար դատական ճանապարհ է անցել՝ Սյունիքի մարզի առաջին ատյանի դատարանի 2005թ. մայիսի 18-ի դատավճռով Ռազմիկ Սարգսյանը, Մուսա Սերոբյանը և Արայիկ Զալյանը մեղավոր էին ճանաչվել ՀՀ քրեական օրենսգրքի 104-րդ հոդվածի 2-րդ մասի 1-ին, 5-րդ և 7-րդ կետերով՝ մի խումբ անձանց կամ կազմակերպված խմբի կողմից երկու կամ ավելի անձանց առանձին դաժանությամբ սպանություն և դատապարտվել էին 15-ական տարվա ազատազրկման:
ՀՀ քրեական եւ զինվորական գործերով վերաքննիչ դատարանը, 2006թ. մայիսի 30-ի դատավճռով, առաջին ատյանի դատարանի դատավճիռը փոփոխել էր, և Ռ. Սարգսյանին, Մ. Սերոբյանին ու Ա. Զալյանին դատապարտել ցմահ ազատազրկման:
2006թ. դեկտեմբերի 22-ին ՀՀ վճռաբեկ դատարանի քրեական պալատի որոշմամբ, ստորադաս դատարանների դատավճիռները բեկանվել էին և նրանց մասով գործն ուղարկվել էր նոր նախաքննության, իսկ ամբաստանյալները` ազատվել կալանքից:
2012թ. դեկտեմբերի 4-ին Շիրակի մարզի ընդհանուր իրավասության դատարանում, դատական վիճաբանությունների փուլում, մեղադրողները, ամբաստանյալներին առաջադրված մեղադրանքը փոփոխել էին և սպանության փոխարեն առաջադրել նոր մեղադրանք՝ ՀՀ քրեական օրենսգրքի 112-րդ հոդվածի 2-րդ մասի 1-ին, 6-րդ եւ 14-րդ կետերով՝ մի խումբ անձանց կամ կազմակերպված խմբի կողմից պատճառելը երկու կամ ավելի անձանց նկատմամբ դիտավորությամբ առողջությանը ծանր վնաս պատժառելը, որն անզգուշությամբ առաջացրել է տուժողների, այսինքն՝ ամբաստանյալների ծառայակիցներ Ռոման Եղիազարյանի ու Հովսեփ Մկրտումյանի, մահը:
Շիրակի մարզի ընդհանուր իրավասության դատարանի դատավճռով ամբաստանյալներ Ռազմիկ Սարգսյանը, Մուսա Սերոբյանն ու Արայիկ Զալյանը անմեղ էին ճանաչվել ու արդարացվել՝ կատարված հանցագործությանը նրանց մասնակցությունը ապացուցված չլինելու հիմքով:
Սոնա Մաշուրյան
«Փաստինֆո»
