Ադրբեջանում հացադուլ է սկսել ցմահ ազատազրկում կրող 30 բանտարկյալ
Ռուսական Regnum լրատվական գործակալության փոխանցմամբ՝ Գոբուստանի բանտում ցմահ ազատազրկում կրող 30 բանտարկյալ հայտարարել է հացադուլ սկսելու մասին: Այս մասին գործակալությանը հայտնել է Ադրբեջանի Իրավապաշտպան կենտրոնի տնօրեն Էլդար Զեյնալովը:
Վերջինիս խոսքերով՝ հացադուլի մասնակիցները նախկինում մահապատժի դատապարտվածներն են. «1998 թվականին օրենք ընդունվեց Քրեական օրենսգրքում ուղղումներ կատարելու մասին, որով վերացվեց մահապատիժը:
Մահապարտների պատիժը փոխարինվեց ցմահ ազատազրկմամբ, իսկ դա ապօրինի է: Օրենքով նրանց պատժաչափը կարող էր փոխարինվել միայն առավելագույն պատժաժամկետով՝ 15 տարի ազատազրկմամբ: Այժմ հացադուլի մասնակիցները հենց դա են պահանջում»:
