Թետչերի դիրքորոշումը վճռորոշ է եղել «Սառը պատերազմը» ավարտելու գործընթացում. Շևարդնաձե
Ռուսական РИА Новости լրատվական գործակալության փոխանցմամբ՝ Վրաստանի նախկին նախագահ Էդուարդ Շևարդնաձեն ափսոսանք է հայտնել Մեծ Բրիտանիայի նախկին վարչապետ Մարգարետ Թետչերի մահվան կապակցությամբ և կարևորել է նրա ներդրումը «Սառը պատերազմը» ավարտելու գործընթացում:
Այս մասին հայտարարել է Շևարդնաձեի մամլո քարտուղար Մարինա Դավիթաշվիլին: Շևարդնաձեի խոսքերով՝ Թետչերը մտնում է 20-րդ դարի ամենաազդեցիկ քաղաքական գործիչների թվում, իսկ Մեծ Բրիտանիան կարևորագույն միջնորդական դեր է ունեցել «Սառը պատերազմի» ավարտի հարցում.
«Պետք է ընդգծել, որ հենց «երկաթյա լեդիի» անձնական դիրքորոշումը վճռորոշ նշանակություն է ունեցել այդ գործընթացներն արագացնելու հարցում: Ինձ վրա մեծ տպավորություն է թողել նրա հետ իմ առաջին հանդիպումը: Հանդիպումից հետո նա ճանապարհեց ինձ՝ թեև հյուրերին նա սովորաբար հրաժեշտ է տալիս իր կաբինետում: Դա տպավորություն գործեց ինձ վրա»:
