Միջազգային դիտորդներ դեռ չեն հրավիրել
Կենտրոնական ընտրական հանձնաժողովը (ԿԸՀ) դեռևս որոշում չունի՝ մայիսի 5-ին կայանալիք Երևանի ավագանու ընտրությունների ընթացքին հետևելու համար միջազգային դիտորդական կազմակերպություններ հրավիրվելո՞ւ են, թե՞ ոչ: Այս մասին 168.am-ին ասաց ԿԸՀ մամուլի քարտուղար Հերմինե Հարությունյանը:
«Որևէ միջազգային կազմակերպության՝ դիտորդական առաքելություն իրականացնելու հրավեր դեռ չենք ուղարկել, և այս պահի դրությամբ՝ նման նախաձեռնություն չկա»,- ասաց Հերմինե Հարությունյանը: Նա նշեց, որ միջազգային դիտորդական խմբերի մասնակցությունը պարտադիր է միայն համապետական ընտրությունների ժամանակ: Հարցին, թե հնարավո՞ր է, որ առհասարակ հրավեր չուղարկվի, ԿԸՀ մամուլի քարտուղարը պատասխանեց. «Դեռ ժամանակ ունենք, բայց հիմա չեմ կարող պատասխանել, միգուցե և ուղարկվի, ուղղակի այս պահի դրությամբ ուղարկելու որոշում չկա»: Նա ասաց, որ միջազգային դիտորդներին հրավեր ուղարկելու վերջնաժամկետ չկա, բայց այնպես պետք է կազմակերպել գործընթացը, որպեսզի հրավիրվող կողմը ևս հնարավորություն ունենա նախապատրաստվել: Հերմինե Հարությունյանը հիշեցրեց, որ դիտորդների հավատարմագրումը և հավատարմագրված դիտորդների ցանկում փոփոխությունները, ըստ Ընտրական օրենսգրքի, կատարվում են ընտրության նշանակվելու օրվանից հետո, բայց քվեարկության օրվանից ոչ ուշ, քան 10 օր առաջ: Ըստ ԿԸՀ-ի սահմանած ժամանակացույցի՝ մայիսի 5-ի Երևանի ավագանու ընտրություններին հետևելու համար դիտորդները կարող են հավատարմագրվել 2013թ.-ի փետրվարի 21-ից մինչև ապրիլի 25-ը:
Հիշեցնենք, որ 2009թ. մայիսի 31-ի Երևանի ավանագու ընտրություններին մասնակցել է ընդամենը մեկ միջազգային դիտորդական կազմակերպություն՝ «Եվրոպայի խորհրդի տեղական և տարածքային իշխանությունների կոնգրես» կազմակերպությունը՝ 15 դիտորդով:
Ինչ վերաբերում է դիտորդական առաքելություն իրականացնող տեղական կազմակերպություններին, ապա ավանագու նախորդ ընտրություններին մասնակցել է 29 տեղական հասարակական կազմակերպություն: 2013թ. մայիսի 5-ի ընտրություններին հետևելու դիմում ԿԸՀ առայժմ երկու տեղական կազմակերպություն է տվել՝«Ընտրական համակարգեր կենտրոնը»՝ 60 դիտորդ, և «Իրավակիրթ հասարակությունը»՝ 50 դիտորդ: Նկատենք, որ դիտորդական կազմակերպությունների դիմումներն ակտիվանում են առավելապես վերջնաժամկետի ավարտին:
