Վոլոչկովան Տարոն Մարգարյանի համար անվճար համերգ չի տա
Անաստասիա Վոլոչկովան անվճար համերգ չի տա՝ Երևանի քաղաքապետ Տարոն Մարգարյանի նախընտրական քարոզարշավի շրջանակներում, նման պայմանավորվածություն չի եղել։ Այդ մասին ֆեյսբուքի իր էջի միջոցով հայտարարել է Վոլոչկովայի համերգների կազմակերպիչ, «FORPOSTART» ընկերության գլխավոր տնօրեն Զառա Մխեյանը։
Նա նշել է, որ 2012 թվականին բանակցություններ են տարվել Երևանի մանկատների և տուն-ինտերնատների երեխաների համար բարեգործական համերգ կազմակերպելու կապակցությամբ։ Իսկ 2013 թվականի սեպտեմբերի 15-ին տեղի կունենա Վոլոչկովայի շքեղ համերգը և մի շարք այլ միջոցառումներ, որոնք կազմակերպվում են «FORPOSTART» ընկերության կողմից։
«Մեկ անգամ ևս նշում եմ, որ Անաստասիա Վոլոչկովայի PR-մենեջերը պատասխան է պատրաստում Հայաստանի բոլոր ԶԼՄ-ների համար։ Մենք պահանջում ենք ԶԼՄ-ներից հերքել այդ կեղծ տեղեկատվությունը և առայժմ չենք պահանջում նյութական որևէ փոխհատուցում»,- նշել է Վոլոչկովայի համերգների կազմակերպիչը։
Հիշեցնենք, որ որոշ ԶԼՄ-ներ տեղեկատվություն էին տարածել այն մասին, որ ապրիլի կեսերին Վոլոչկովան ժամանելու է Երևանի քաղաքապետ Տարոն Մարգարյանի հրավերով և անվճար համերգ է տալու Երևանի ավագանու ընտրություններին նրա քարոզարշավի շրջանակներում։
