Սիրիական ընդդիմությունը պաշտոնապես կզբաղեցնի Սիրիայի տեղը Արաբական պետությունների լիգայում
France-Presse լրատվական գործակալության փոխանցմամբ՝ սիրիական ընդդիմությունը պաշտոնապես ստացել է Սիրիայի տեղը Արաբական պետությունների լիգայում (ԱՊԼ): Դա տեղի է ունեցել Կատարի մայրաքաղաք Դոհայում կայանալիք ԱՊԼ ղեկավարների գագաթաժողովի նախօրեին:
Այս մասին հայտնել է ԱՊԼ-ում բարձրաստիճան ներկայացուցիչը: Վերջինիս խոսքերով՝ սիրիական ընդդիմությունը պաշտոնապես հրավիրվել է արաբական գագաթաժողովին և զբաղեցնելու է ԱՊԼ-ում Սիրիայի տեղը:
ԱՊԼ-ի անդամ երկրների արտգործնախարարները հավանություն են տվել Կատարի առաջարկին՝ այդ կազմակերպությունում Դամասկոսի փոխարեն սիրիական ընդդիմությանը տեղ հատկացնելու մասին:
Սակայն դրան դեմ են արտահայտվել Ալժիրի ու Իրաքի արտգործնախարարները՝ ընդգծելով, որ այդպիսի որոշումը հակասում է ԱՊԼ-ի կանոնադրությանը: Սիրիայի հարևան Լիբանանը ձեռնպահ է մնացել:
Նշվում է, որ ԱՊԼ երկրների արտգործնախարարները երեկ հավաքվել են Դոհայում՝ նախապատրաստելու համար ԱՊԼ անդամ երկրների ղեկավարների տարեկան գագաթաժողովը, որն անցկացվելու է մարտի 26-27-ին: Այդ նպատակով Դոհա է ժամանել ԱՊԼ-ի 93 ներկայացուցիչ, որոնք իրենց հետ Դոհա են բերել մոտ 1.5 տոննա փաստաթուղթ՝ տարեկան գագաթաժողովին նախապատրաստվելու համար:
